АҚШ Президенти Дональд Трамп Россия - Украина можароси билан боғлиқ қизиқарли маълумотларга эга бўлгани, бу тез орада оммага маълум қилинишини билдирди:

- Мен қизиқ нарсаларни ўргандим. Ўйлайманки, тез кунларда сиз ҳам билиб оласиз.

Трамп журналистларнинг "Ўтган ҳафта давомида Президент Владимир Путин билан гаплашдингизми? деган саволига шундай жавоб берган. Шунингдек, Аляскадаги учрашув жуда яхши ўтганини қайд этган:

- Кўрамиз, бундан нима чиқади. Агар натижа бўлмаса, бошқача йўл тутамиз.

Оқ уй хўжайини америкалик журналист Скотт Женнингс билан телефон орқали суҳбатда Россия етакчиси билан доим аъло даражада муносабатда бўлгани, аммо ҳозир ундан “жуда ҳафсаласи пир экани"ни айтган. Шунга қарамай, Россия - Украина зиддиятини бартараф қилиш жараёнидаги иштирокини давом эттириш истаги ҳақида гапирган.

- Урушни тўхтатишга ёрдам бера олсам, демак, мен бу ишни қилишга мажбурман, деб ўйлайман, - деган Трамп.

Америка етакчиси можаро давом этаётгани, инсонлар қурбон бўлаётганидан ҳафсаласи пирлигини қўшимча қиларкан, гап Украина ҳақида эмас, балки тинчликни сақлаб қолишда эканига эътибор қаратган.

С.Раҳимов, ЎзА