Кеча пойтахтимиздаги “Юнусобод” спорт мажмуасида футзал бўйича Олий лиганинг 1-тури доирасидаги ўйинлар бўлиб ўтди.

Марказий ўйин сўзсиз Ўзбекистон суперкубоги финалчилари BMB (Жиззах) - “Oil Star” (Бухоро) жамоалари ўртасида кечди. Қизиқарли ва муросасиз ўтган баҳсда дуранг (1:1) натижа қайд этилди. Учрашув якунида "Oil Star" аъзоси Беҳрўз Самиев учрашувнинг энг яхши футзалчиси, деб топилди.

ОКМК (Олмалиқ) - “Бунёдкор” (Тошкент) “дуэли”да пойтахт футзалчилари 2:3 кўринишида устунликка эришди. “Бунёдкор” аъзоси Ҳусанхон Ғаниев учрашувнинг энг яхшиси номига лойиқ кўрилди.

Пойтахтнинг “Локомотив” ва Тошкент вилоятининг “Максам-Чирчиқ” жамоалари ўртасидаги қарама-қаршиликда “Локомотив” жамоаси аъзолари рақибларини 7:2 ҳисобида доғда қолдирди. Пойтахтлик Фарҳод Абдумавлонов учрашувнинг энг яхшиси номига сазовор бўлди.

Бугун, 3 сентябрь куни 1-турнинг иккинчи кунги ўйинлари ташкил этилади. Олий лига баҳслари учун ташланган қўръага кўра, унда “Максам-Чирчиқ” - BMB (Жиззах), “Бунёдкор” (Тошкент) - “Локомотив” (Тошкент), ОКМК (Олмалиқ)- “Oil Star” (Бухоро) жамоалари куч синашади.

Ортда қолган ўйинлар сарҳисобига биноан “Локомотив” ва “Бунёдкор” 3 очко билан пешқадамлик қилмоқда.

Эслатиб ўтамиз, Олий лига 1-тур ўйинлари 7 сентябрга қадар давом этади.

Т.Рўзиев,

ЎзА