Молдова мустақиллик куни арафасида, Франция президенти Эммануэль Макрон, Германия канцлери Фридрих Мерц ва Польша бош вазири Дональд Туск мамлакат пойтахти Кишинёвга ташриф буюрди. Мухолиф партиялар бу ташриф, 28 сентябрь куни бўлиб ўтадиган парламент сайловлари олдидан уюштирилаётганини айтмоқда.

Чунки, Европага интилаётган президент Майя Санду учун бу жуда муҳим саналади. Молдова етакчисининг хавотир олганича бор, маълумотларга қараганда Кремль томонидан қўллаб-қувватланаётган гуруҳлар сайлов жараёнларига таъсир қилиши мумкин, деб тахмин қилинмоқда. Шунинг учун ҳам Санду Европа ва Украина билан яқин алоқаларни ўрнатишга интилмоқда.  

Елисей саройи маълумотига кўра, Европа етакчилари Молдованинг суверенитети, хавфсизлиги ва Европа йўлидан бориш ниятини қўллаб-қувватламоқда. Молдова президенти матбуот хизмати ҳам Россиянинг сайловларга аралашуви кучаяётган бир пайтда, бу ташрифнинг катта аҳамиятга эга эканини таъкидлади. Июль ойида Майя Санду Россияни сайловларга аралашув учун тайёрлаётганликда айблади.  

- Россия томонидан овозларни сотиб олиш ва молиявий қўллаб-қувватлаш орқали сайлов натижаларини ўзгартиришга уринишлар кузатилмоқда, - деган у.

Европа раҳбарларининг ташрифи Молдованинг Россияпараст мухолиф кучлари томонидан кескин танқид қилинмоқда. Собиқ президент Игорь Додон европаликларнинг бу ташрифини сайлов жараёнига «бевосита аралашув» деб атади. Агарда Европада шундай ҳолат юз берганида албатта, катта можарога сабаб бўлар эди, деган.

Молдова Украинa ва Руминия орасида жойлашган кичик мамлакат бўлиб, ўз ҳудудининг бир қисми бўлган Приднестровьени назорат қила олмайди. Приднестровье Россия томонидан қўллаб - қувватланади. Гарчи, мустақиллик эълон қилган бўлсада халқаро ҳамжамият томонидан тан олинмаган.

Ҳозирда Майя Санду раҳбарлик қилаётган партия парламентдаги кўпчиликни сақлаб қолишга ҳаракат қилмоқда. Ўтган йилги сайловларда у иккинчи президентлик муддатини қўлга киритган бўлса-да, сайлов жараёнида қалбакилаштириш ва овоз сотиб олишга оид шубҳалар пайдо бўлди. Хуллас, Европа етакчилари Молдованинг мустақиллиги ва Европа йўлидаги истиқболини қўллаб-қувватлаш учун бирдамлик намойиш этишди. Бу эса Кремльнинг таъсирини пасайтиради  ва Молдова сайловларининг адолатли ўтишига катта таъсир қилади, деб умид қилишмоқда.

<iframe width="640" height="420" src="https://www.youtube.com/embed/ZLJEQ0Dksc4" title="Yevropa yetakchilari Kishinyovda yig‘ilishdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев (видео), ЎзА