Мамлакатимизда кейинги йилларда футбол бўйича катта юксалишларга эришилгани қилинган ишларда, қўлга киритилган ютуқларда ўз аксини топмоқда.

Миллий терма жамоамизнинг Жаҳон чемпионатида иштирок этиши, Олимпия терма жамоамизнинг "Париж-2024" Олимпиадасида қатнашгани, ёшлар ва ўсмирлар жамоаларимизнинг нуфузли мусобақаларда муносиб натижалар қайд этиб келаётгани ўзбек футболи ривожланаётганидан далолат.

[gallery-24999]

Шу кунларда юртимизда меҳмон бўлиб турган жаҳон футболининг яқин ўтмишдаги ёрқин вакиллари Роберто Карлос, Марко Матерацци, Дуглас Майкон, Франк Рибери, Клод Макалеле, Кристиан Заккардо билан мухлислар, журналистлар ўртасида ўтказилган суҳбатларда мазкур фикрлар бот-бот тилга олинди.

Мулоқотлар жараёнида дунё футболи вакиллари миллий терма жамоамизнинг Жаҳон чемпионати йўлланмасига эга чиққани билан табриклаб, бу, Ўзбекистонда спорт, хусусан футбол ривожига, унинг оммавийлигини таъминлашга, истеъдодли ёшларни тайёрлашга берилаётган алоҳида эътибор, қўллаб-қувватлашнинг маҳсули эканини билдиришди.

Ўтказилган суҳбатлардан сўнг таниқли футболчилар пойтахтимиздаги “Бунёдкор” футбол академияси фаолияти билан танишди, ёш чарм тўп усталари билан амалий машғулотларда қатнашди.

Шундан сўнг, Ўзбекистон ҳамда жаҳон футболи афсоналари иштирокида ўртоқлик ўйини ташкил этилди.

Ўзбек футболининг ёрқин вакиллари Миржалол Қосимов, Одил Аҳмедовлар ҳамда Роберто Карлос, Дуглас Майкон, Франк Рибери, Клод Макалелелар қарама-қаршилигидаги ўйин ҳар жиҳатдан қизиқарли ўтди. Томошабинларга бир олам завқ улашди. Дўстона руҳда кечган ўйинда ҳамюртларимиз 6:5 ҳисобида зафар қучди.

Т.Рўзиев,  

А.Мамадаминов (сурат)

ЎзА