Аср лойиҳаси дея эътироф этилаётган “Ёшлик I конини ўзлаштириш” инвестициявий лойиҳаси доирасида Технологик транспорт бошқармаси паркига 3 дона энг замонавий «HITACHI EH4000AC-3» карьер автосамосваллари келтирилди.
Ушбу замонавий гигант автосамосваллар жорий йилнинг июль ойида қисмларга бўлинган ҳолда тўлиқ етказиб келтирилган бўлиб мутахассислар томонидан қисқа муддатда йиғиб бўлинди. Жорий йилнинг 22 август куни “Олмалиқ КМК” АЖ бошқарув раиси Абдулла Хурсанов мазкур карьер автогигантларини ишлаб чиқариш жараёнига сафарбар этиш олдидан комбинат транспорт соҳаси вакиллари билан учрашди.
Учрашув давомида Абдулла Хурсанов ушбу замонавий автосамосваллар Ўзбекистонда илк бор “Ёшлик I” конида ишлатилиши, ишлаб чиқаришда белгиланган вазифалар ва кўрсаткичларни бажаришда, маъдан ташиш ишлари ҳажмининг ошишида муҳим аҳамият касб этишини таъкидлади. Технологик транспорт бошқармасига келгусида шу каби кўплаб замонавий гигант техникалари келтирилишини маълум қилди.
Япония технологияси асосида ишлаб чиқарилган ушбу замонавий автотранспорт воситаси 221 тонна юк кўтариш қувватига эга бўлиб, бошқарув кабинасида ҳайдовчи учун барча шароит ва қулайликлар яратилган. Бошқарув тизими замон талабларига асосан тўлиқ электрон тарзда автоматлаштирилган. Бу ҳайдовчига машинани осон ва енгил бошқариш имконини беради. Транспорт воситасига оғир юк кўтариш ва ташиш қобилиятини оширишда ҳамда қўшимча афзалликларни таъминлайдиган янада кучли “КАММИНЗ” ички ёнув двигатели ўрнатилган. Бошқа турдаги техникаларига нисбатан мустаҳкам ва кучли таянчлари-рамалари билан алоҳида ажралиб туради. Бошқарув вақтида ён-атрофни кўриш учун 360 градус радиусда кузатиш имкониятига эга замонавий видео кузатув камералари билан жиҳозланган. Тортиш тизимлари замонавий генератор ва электр тортув двигателлари билан жиҳозланган. Бу машинанинг ишлашини сезиларли даражада осонлаштиради ва унинг самарадорлигини таъминлайди. Автосамосвалда технологик ташиш жараёнида сирпаниш ёки сирпанишнинг олдини олиш, бўйлама текисликдаги тебранишларни камайтириш, ён силжишнинг олдини олиш, электродинамик тўхташ тормозлаш тизими, автоматик тезликни бошқариш, ҳатто юқоридан пастга ҳаракатланаётганда ҳам олдиндан ўрнатилган тезлик оралиғини сақлаш имконияти мавжуд.
Мазкур компания мутахассислари томонидан ушбу гигантларни бошқариш ва тўғри эксплуатация қилиш бўйича Технологик транспорт бошқармасининг 33 нафар ҳайдовчи ходимлари учун махсус профессионал ўқув курслари ҳам ташкил этилди.
Эндиликда “Ёшлик I” конида 3 дона “HITACHI EH4000AC-3” карьер автосамосваллари кончиларнинг энг яқин кўмакчиси сифатида иш бошлайди. Келгусида Технологик транспорт бошқармасига яна шундай гигантлардан 7 дона олиб келиниши кутилмоқда. Бундан ташқари, бугунги кунда тоғ жинсларини ташишда “Ёшлик I” конида 2017-2020 йилларда 54 дона юк кўтариш қуввати 130 тонна ва 29 дона юк кўтариш қуввати 220 тоннага эга “БелАЗ” русумли карьер автосамосваллари олиб келинди ва фойдаланилмоқда. 2024 йилда маҳаллийлаштириш лойиҳаси асосида ҳамкорликда Ӯзбекистонда ишлаб чиқарилган 5 дона “NMT-240” русумли юк кўтариш қуввати 236 тоннага эга бўлган гигантлар олиб келиниб, ҳозирда улар ҳам конда тоғ жинсларини ташимоқда.
Мазкур автосамосвалларнинг комбинатга олиб келиниши мустақиллигимизнинг 34 йиллигига муносиб совға бўлди, десак муболаға бўлмайди.
ОКМК Ахборот хизмати