Йод етишмовчилиги оқибатларини бартараф этиш юзасидан маҳалла еттиликлари ва шифокорлар билан бўлган маслаҳатлашув чоғида Қўқон шаҳар ҳокими Маъруфжон Усмонов қон таҳлилини ўтказувчи ноёб тиббий жиҳоз –“IHLA maglumi”ни ички имкониятлардан келиб чиқиб сотиб олишга ваъда берган эди.

Ҳа энди битта тиббий техник восита билан таъминласа таъминлабдида ҳокимлик, дейишга шошманг.

Биринчидан, йод етишмаслиги аҳолида жиддий муаммолар келтириб чиқармоқда.

– Йод етишмовчилиги асосан ёш болалар, ўсмирларда жисмоний, ақлий, руҳий заифлашувга олиб келади, – дейди Республика ихтисослаштирилган эндикринология илмий-амалий тиббиёт маркази Фарғона филиали раҳбари Озодбек Мавлонов. – Ёши катталарда эса фикрлаш, қарор қабул қилиш қобилиятларининг пасайиши, ишда фаолликнинг сусайиши ва ошқозон ҳазм қилиш функциясининг ишдан чиқишига сабаб бўлади. Ҳамда инсонда руҳий чарчаш рўй беради.

Иккинчидан, бу тиббий аппарат анчагина қиммат ва камёб. Масалан, у Фарғона вилоятида битта эди. Энди Қўқон шаҳридаги кўп тармоқли оилавий поликлиникага ҳам келтириб ўрнатилди ва шаҳар аҳолисига навбат билан узлуксиз хизмат кўрсата бошлади.

– Бу “IHLA maglumi” аппаратимизда юздан ортиқ гармонларни,  A, B, C, D гепатит турларини аниқлаш мумкин, – дейди олий тоифали лаборант–шифокор Қаҳрамон Холиқов. – Илгари, “IHLA maglumi” йўқлигида беморларни вилоят марказига юборар эдик. Энди бу таҳлиллар Қўқоннинг ўзида амалга ошириляпти. Биз шу ойнинг ўзида 300 дан зиёд беморда қон таҳлилларини ўтказиб, эндикринолог шифокорларга топширдик.

Ҳа, ҳоким сўзининг устидан чиқди.  

<iframe width="640" height="420" src="https://www.youtube.com/embed/dbVz0zXjRDI" title="Hokim so‘zining ustidan chiqdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (сурат, видео), ЎзА