Бугун, 24 август куни Польшада шахмат бўйича “61st Rubinstein Memorial-2025” турнирининг сўнгги 9-тур ўйинлари бўлиб ўтади.
Кеча дунё шахмат ишқибозлари эътиборида бўлган мазкур турнирнинг 8-турида ҳамюртимиз Нодирбек Ёқуббоев оқ доналарда польшалик Матеуш Бартел билан куч синашди.
Қизиқарли кечган баҳсда Ёқуббоев ғалабага яқин эди. Аммо, айрим вазиятлардаги ноаниқ ҳаракатлар турни дуранг билан якунланишига олиб келди. Ушбу натижа терма жамоамиз аъзосини “61st Rubinstein Memorial-2025” турнири ғолиблигига яна бир қадам яқинлаштирди.
Бугун ўтадиган 9-тур остонасида Нодирбек 6 очко билан турнир жадвалида етакчилик қилмоқда. Уни таъқиб этаётган польшалик Матеуш Бартел ва Радослав Войташек, чехиялик Давид Наваралар 5 очко жамғарган ҳолда кейинги поғоналарни банд этган.
Сўнгги турда Ёқуббоев қора доналарда 4 очко билан 5-поғонада бораётган украиналик Игорь Коваленко билан рўбарў келса, Матеуш Бартел Польша вакили Ян Климковскига, Давид Навара Радослав Войташекка қарши баҳс олиб боради.
Т. Рўзиев, ЎзА