ФОТОТАНҚИД

Қарши шаҳри марказида Амир Темур кўприги ёнида жойлашган истироҳат боғининг очилиши маҳаллий аҳолини беҳад қувонтирган эди. Дарё бўйидаги сўлим масканда барча шароитлар бор эди. Катамаранлар, болалар учун аттракционлар, спорт майдончалари доимо одамлар билан гавжум эди. Айниқса ёзнинг жазирама кунларида бу маскан жоннинг роҳати бўларди. Одамлар бу масканни “шаҳарнинг ўпкаси” деб аташарди. 

Минг афсуски, бугун ушбу хиёбонга сукунат чўмган. Катамаранлар ҳаракатсиз, аттракционлар талон-торож қилинган, ёритиш чироқлари сўнган, сув йўллари қуриган, дов-дарахтлар парваришсиз қолган. 

Бефайз, кун сайин харобага айланиб бораётган хиёбонга боқиб, шаҳарсозликдаги мувозанат, экологик назорат, молиявий барқарорлик ва энг муҳими, жамоат мулкига муносабат ҳақида ўйлаймиз. Чунки бу маскан қанча инсонларнинг орзуси, меҳнати ва умидидан бунёд бўлган эди. 

[gallery-24900]

Уни қайта тиклаш мумкинми? Бизнингча, мумкин. Фақат бунинг учун маблағ билан бирга эътибор ва жамоавий ирода керак. Демак, хиёбоннинг тақдири бизнинг танловимизга боғлиқ: уни буткул унутамизми ёки қайта уйғотамизми? 

Жамшид НОРҚОБИЛОВ (сурат), ЎзА