Мадина Қосимбоева 25 йилдан буён каштачилик билан шуғулланади. Ҳозирги кунда мингдан зиёд шогирди бор. Ёш каштачилик-сўзана устаси жамоаси билан бирга хорижда ташкил этиладиган нуфузли халқаро кўргазмаларда фаол иштирок этади. Европа ва Осиёнинг кўплаб мамлакатларида ўзининг шахсий кўргазмаларини ҳам ўтказган.

Ўзбекистон Республикаси Президентининг шу йил 18 августдаги фармонига мувофиқ, мамлакатимиз иқтисодий қудрати ва экспорт салоҳиятини ошираётган, аҳоли бандлиги ва фаровонлигини таъминлаш йўлида жонбозлик кўрсатаётган бир гуруҳ тадбиркорлар фахрий унвонлар, орден ва медаллар билан мукофотланган эди.

Хусусан, Мадина Қосимбоева “Дўстлик” ордени билан тақдирланди. ЎзА мухбири билан суҳбатда Мадина бу янгиликни эшитгач, қанчалик хурсанд бўлганини гапириб берди.

– Янги иш бошлаганимда кўпчилик нега бу соҳани танлаганимни сўрарди. Бугун шу саволларга жавоб топиляпти. Меҳнатимиз ортидан иқтисодий барқарорликка эришяпмиз, шунингдек, Ўзбекистон миллий-маданий меросини бутун дунёга намойиш қиляпмиз, – деди Шайхонтоҳур туманидаги якка тартибдаги тадбиркор Мадина Қосимбоева.

Унинг таъкидлашича, бу мукофот аёл тадбиркорларга берилаётган имконият ифодасидир. Шу боис жуда хурсанд.

– Инсон барибир умид қилади – ҳар йил фармон чиққач, мукофотланганлар рўйхатидан ўзимни қидирардим. Бу йил устахонада эдим, менга телефон қилиб, юксак эътирофга лойиқ топилганимни айтиб қолишди. Очиғи, бу хабарни эшитгач, қувонч кўз ёшларимни тўхтата олмадим, – дея унутилмас онларни эсга олди каштачи қиз. – Бундай мукофотга сазовор бўлиш катта бахт. Бир ҳунарманд қизнинг меҳнати шунчалик қадрланадиган юртда яшаётганимни ҳар лаҳза ҳис қилиб турибман.

<iframe width="560" height="315" src="https://www.youtube.com/embed/CrQRj2edM7M?si=K91PlmDNDNhCL1J1" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Беҳруз ХУДОЙБЕРДИЕВ,
ЎзА