Швейцариянинг Лозанна шаҳрида енгил атлетика бўйича ўтган “Бриллиант лига” мусобақасининг навбатдаги босқичида Ўзбекистон терма жамоаси аъзоси Анвар Анваров олтин медални қўлга киритди.

Олимпия ўйинлари ғолиб ва совриндорлари, жаҳон енгил атлетикасининг энг номдор спортчилари иштирок этган мазкур нуфузли мусобақада ҳамюртимиз узунликка сакраш дастурида 7.84 метр билан энг юқори кўрсаткични қайд этди.

Иккинчи ўринни швейцариялик Симон Эхаммер (7.72 метр) эгаллаган бўлса, ямайкалик 2019 йилги жаҳон чемпиони Тежей Гейл (7.71) бронза медали соҳиби бўлди.

“Бриллиант лига” мусобақасининг мазкур 13-босқич баҳслари ёмғирли ҳолатда мураккаб вазиятда кечдики, Анвар Анваров деярли кўлмак йўлакда белгиланган маррани маҳорат билан босиб ўтиб, олтин медалга эга чиққани ўзига хос қаҳрамонлик сифатида қайд этилди.

Ушбу мусобақанинг Ўзбекистон енгил атлетикаси учун яна бир аҳамиятли жиҳати, Анвар Анваров Сафина Саъдуллаевадан кейин “Бриллиант лига” турнирларида ғалаба қозонган ўзбекистонлик иккинчи спортчи номига мушарраф бўлди.

“Бриллиант лига” мусобақаларининг кейинги 14-босқич мусобақалари 22 август куни Бельгиянинг Брюссель шаҳрида бўлиб ўтади.

Т.Рўзиев,

ЎзА