Таиландда теннис бўйича эркаклар ўртасида халқаро турнир старт олди. Унда мамлакатимиз шарафини Максим Шин ва Илья Игнатов яккалик ҳамда жуфтлик баҳсларида ҳимоя қилмоқда.
Мусобақанинг жуфтлик беллашувларида Илья Игнатов грециялик шериги Маркос Каловелонис билан бирга мезбон теннисчилар — Терапат Хантивирават ва Наттабют Нитхитананонт жуфтлигини 7:5, 6:2 ҳисобида мағлуб этди ва чорак финалга йўл олди. Игнатов ва Каловелонис ушбу босқичда таиландлик жуфтликлар — Паннават Суттисомбоон / Камонпаякорн Тхадпонг ҳамда Криттин Коаякул / Жират Навасирисомбоон учрашуви ғолибига қарши баҳс олиб боради.
Шунингдек, жуфтликлар йўналишида Максим Шин Жанубий Корея вакили Донг Жу Ким билан биргаликда иштирок этмоқда. Улар илк босқичда қозоғистонлик Григорий Ломакин ва АҚШ шарафини ҳимоя қилаётган Майкл Жу жуфтлигига қарши кортга чиқади.
Максим Шин яккалик беллашувларида ҳам иштирок этмоқда. Унинг иккинчи даврадаги рақиби қозоғистонлик Григорий Ломакин бўлади.
Жавоҳир Тошхўжаев,
ЎзА