Ўзбекистон Суперлигасининг 19-туридан ўрин олган сўнгги беллашувда "Хоразм" 1:0 ҳисобида "Қизилқум" устидан ғалаба қозонди.

Шу тариқа, ушбу тур якунига кўра, “Насаф” 40 очко билан жадвалнинг энг юқори поғонасида қолди. Бир очкога ортда қолаётган “Нефтчи” иккинчи ўринда бораётган бўлса, “Динамо” 37 очко жамғариб, кучли учликдан жой олди. Улар ортидан “Бунёдкор” ва ОКМК 34, “Пахтакор” эса 33 очко жамғарган ҳолда кейинги поғоналарда бормоқда.  

Суперлиганинг 7-ўрнини “Навбаҳор” 31 очко билан банд этиб турган бўлса, “Қизилқум” 25 очко тўплаган ҳолда 8-поғонадан жой олди. “Сурхон” 23 очко, “Aндижон” 21 очко, “Сўғдиёна” 20 очкога эга бўлиб 9-11 ўринларда қайд этилди.  

Кечаги муваффақиятдан сўнг “Хоразм” очколарини 19 тага етказиб, 12-поғонага кўтарилди. “Машъал” ва “Қўқон-1912” клублари бир хил - 18 очкодан жамғариб, чемпионатнинг 13 ва 14-жамоаларига айланди. Қуйи ўринларда “Бухоро” 14, “Шўртан” 10 очко билан қолди.

Ўзбекистон Суперлигасида энг кўп гол урган футболчи сифатида “Пахтакор” ҳужумчиси Игорь Сергеев эътироф этилмоқда. Унинг ҳисобида ҳозиргача 12 та гол бор. Кейинги ўринларда 9 тадан гол билан “Сўғдиёна” етакчиси Люпчо Дориeв ва “Насаф” ҳужумчиси Ҳусайн Норчаев жойлашган.

Суперлиганинг 20-тури 20-23 август кунлари бўлиб ўтади. Қуйида мазкур тур учрашувлари билан танишасиз:  

20 август, чоршанба, “Шўртан” – “Навбаҳор”, “Сўғдиёна” – “Динамо”;

21 август, пайшанба: “Нефтчи” – “Машъал”, “Бухоро” – “Қўқон-1912”;

22 август, жума: “Андижон” – “Пахтакор”, “Қизилқум” – “Бунёдкор”;

23 август, шанба: “Сурхон” – “Насаф”, “ОКМК” – “Хоразм”

Жавоҳир Тошхўжаев,

ЎзА