Бутун дунё оммавий ахборот воситалари АҚШ Президенти Дональд Трамп, Владимир Зеленский ва Европа етакчиларининг Оқ уйда бўлиб ўтган учрашувларини муҳокама қилар экан, бу сафар ҳаммаси дўстона руҳда ўтгани, бироқ айни пайт иттифоқчилар ўртасида келишмовчиликлар ҳам яққол кўзга ташланаётганини таъкидламоқда.

Душанба куни Трамп Оқ уйда Зеленский ва Европа Иттифоқи етакчиларини қабул қилди.

– Трамп ва Зеленский Ясси хонадаги учрашувда ўзаро дўстона муносабат намоён қилишди, – дейилган “Politico” нашри эълон қилган мақолада.

Испаниянинг “Pais” газетаси Трамп ва Зеленский учрашувини енгил, некбинлик билан ифодалаган.

– Бу гал тузоқ йўқ эди, – деб ёзди ўз навбатида “Point” газетаси.

Шунингдек, кўплаб ОАВ душанба кунги ва февраль ойидаги учрашувлар ўртасидаги қарама-қаршиликка эътибор қаратди. “Pais” қайд этишича, кеча Америка раҳбарияти Зеленскийга танбеҳ берилган аввалги учрашувдан бутунлай фарқли эди.

“Parisien” газетаси эса энди вице-президент Жей Ди Венс “орага суқилмаган”ига эътибор қаратди.

Британиянинг “Daily Mail” нашри учрашув дипломатик “кўнгилсизликдан холи” ўтгани ва Зеленскийга “заҳар қўшилган чой берилмагани”ни таъкидлаган.

“Economist” журнали Трамп ва Зеленский ҳеч бўлмаганда омма олдида қийин саволлардан қочганига урғу берди.

Зеленскийнинг ташқи кўриниши “Wall Street Journal” диққати марказида турди: Украина етакчиси ҳарбий кийимини “костюмга ўхшаган либосга алмаштирибди”.

“Economist” журнали эътиборидан Америка етакчиси “ҳар бир иттифоқчини навбатма-навбат мақтагани” ҳам четда қолмади.

– ...бироқ, АҚШ Президенти, Зеленский ва ЕИ етакчилари делегациялари ёндашувларидаги келишмовчилик давом этаётгани кўзга ташланди, – деб ёзди Британиянинг “Times” нашри.

АҚШ Президенти Зеленский ва Европа етакчилари билан ўтказилган музокарани “жуда самарали” деб атаган ва Путин – Зеленский учрашувига тайёргарлик бошланганини маълум қилган.

– Жуда самарали учрашув давомида биз Украина учун қатор Европа давлатлари томонидан Америка Қўшма Штатлари билан келишилган ҳолда тақдим этиладиган хавфсизлик кафолати мавзусини муҳокама қилдик, – деб ёзди Трамп ижтимоий тармоқдаги саҳифасида.

Шунингдек, у Оқ уйдаги музокаралардан сўнг россиялик ҳамкасбига қўнғироқ қилгани ва “Президент Путин ва Президент Зеленский ўртасида ўтказиладиган, ҳозир жойи аниқланаётган учрашувга тайёргарлик кўра бошлагани”ни билдирган:

– Энди уч томонлама учрашув ўтказиб, икки Президент ва мен иштирок этамиз.

Трамп вице-президент Жей Ди Венс, Давлат котиби Марко Рубио ва махсус элчи Стив Уиткоффга Москва ва Киев ҳамкорлигини мувофиқлаштириш бўйича кўрсатма берган.

Аввалроқ Россия етакчиси ёрдамчиси Юрий Ушаков Путин ва Трамп телефон орқали 40 дақиқа суҳбатлашгани, Америка етакчиси ҳамкасбини Зеленский ва ЕИ етакчилари билан музокара натижасидан хабардор қилгани ҳақида гапирганди. Унинг қайд этишича, суҳбат “очиқ ва жуда конструктив” ўтган,
Путин ва Трамп Россия – Украина делегациялари ўртасидаги бевосита музокарани давом эттириш тарафдори эканини билдирган.

Германия Канцлери Фридрих Мерц Трамп билан учрашувдан сўнг “хоҳловчилар коалицияси” конференцияси ўтказилишини эълон қилди.

– Трамп билан суҳбатдан сўнг Украинани қўллаб-қувватлашга тайёр турган коалиция видеоконференцияси, кейин Европа кенгашининг навбатдан ташқари йиғилиши бўлиб ўтади, – деган у. – Ушбу коалиция таркибида жами 30 давлат тўпланган.

Конференцияда Трамп билан учрашган Европа вакиллари Вашингтон музокаралари ҳақида ҳисобот бериши кутиляпти.

Мерцнинг матбуот анжумани Германиянинг “Welt” нашри сайтида намойиш этилди.

С.Раҳимов, ЎзА шарҳловчиси