Қозоғистоннинг Чимкент шаҳрида ўқ отиш спорти бўйича ёшлар ва катталар ўртасида ўтказилаётган XVI Осиё чемпионатининг илк кунида Ўзбекистон терма жамоаси аъзолари дастлабки медални қўлга киритди.

Чимкентдаги “Shymkent Shooting Plaza” мажмуасида бошланган қитъа чемпионатининг очилиш маросимида иштирок этган Халқаро ўқ отиш спорти федерацияси раҳбари, Осиё ўқ отиш конфедерацияси президенти қитъада ушбу спорт турлари жадаллик билан ривож топаётганини эътироф этди.

Таъкидланганидек, чемпионатда қатнашаётган 27 мамлакатнинг 756 нафар спортчиси баҳслар давомида "тўппонча", "ҳаракатдаги мўлжал", "стендда ўқ отиш", "трап", "скит", "скит-микс" каби ўнлаб йўналишларда 700 тадан зиёд медаллар жамланмаси учун кураш олиб боришади.

Мусобақанинг кеча ўтказилган биринчи кунги баҳсларида Ўзбекистон терма жамоаси аъзоси Илҳомбек Обиджонов ёшлар ўртасида 10 метрдан пневматик тўппончадан отиш дастурида кумуш медалга сазовор бўлди.

Бугун, 19 август куни чемпионат дастуридан ўрин олган пневматик тўппончадан ўқ отиш йўналиши бўйича ўсмирлар ва қизлар ўртасидаги мусобақалар бўлиб ўтади.

Чемпионат 30 августга қадар давом этади.

Т.Рўзиев,

ЎзА