Хитойда слаломда эшкак эшиш бўйича давом этаётган Осиё чемпионатида Ўзбекистон терма жамоаси аъзолари муваффақиятли иштирок этмоқда.

Жумладан, мусобақанинг К1 йўналишида мамлакатимиз шарафини ҳимоя қилаётган Павел Эйгель маррага иккинчи бўлиб келди ва кумуш медални қўлга киритди. Ушбу йўналишдаги олтин ва бронза медаллари Лиман Хуан (Хитой) ҳамда Косуки Саитога (Япония) насиб этди. Шунингдек, Павел экстрим слалом йўналиши бўйича учинчи натижани қайд этди ва бронза медалига эга чиқди. К1 жамоавий баҳсларида Павел Эйгель, Самандар Сайдуллаев ва Жанибек Темиргалиевдан ташкил топган жамоамиз шоҳсупанинг учинчи ўрнидан жой олди.

Осиё чемпионатининг C1 жамоавий баҳсларида Анвар Клевлеев, Абубакир Буканов, Шерзод Қурбоналиевдан иборат жамоамиз муносиб иштирок этиб, бронза медалига сазовор бўлди.  

Жавоҳир Тошхўжаев,

ЎзА