Бугун тун бўйи бутун дунё оммавий ахборот воситалари эътибори АҚШнинг Аляска штатида ўтган Президент Дональд Трамп ва Россия Федерацияси етакчиси Владимир Путин ўртасидаги учрашувга қаратилди, десак муболаға бўлмайди. Зеро, узоқ кутилган ушбу мулоқот охирги йиллардаги энг йирик ҳарбий можарони тўхтатиш мақсадида ташкил этилди. Икки қудратли давлат раҳбарлари суҳбатидан сўнг уюштирилган қўшма матбуот анжуманида Трамп ва Путин бир-бирига нисбатан илиқ сўзлар билан алмашган бўлса-да, учрашув натижасида аниқ бир хулосага келингани ҳақида бирор баёнот бермадилар.

Президентлар делегацияларнинг қисқа таркиби иштирокида қарийб уч соат гаплашгани маълум.

Америка Қўшма Штатлари ва РФ раҳбарлари Анкорижда, аниқроғи  ушбу мўъжаз шаҳарча аэродромида кўришди. Улар, деярли, бир вақтда учиб келган самолётларидан бир-бирларига пешвоз чиқиб, жуда кўп ҳамкасбларимиз алоҳида эътибор берганидек, икки марта ўзаро илиқ қўл сиқишган.

Етакчилар аввалига журналистларнинг саволларига жавоб беришдан тийилишган.

Дарвоқе, ушбу тарихий воқеа олдидан Украина Президенти Владимир Зеленский айтган бир гап кўпчиликнинг эътиборини тортди: Биз Американинг кучли позициясидан умидвормиз. Ҳаммаси шунга боғлиқ — россияликлар Америка кучини ҳис этишади, деб ўйлаймиз. Ҳа, айнан куч-қудратни!                                                                                                                                                                                                                                               Кремль фикрича, "Трамп билан суҳбат "жуда кўтаринки" руҳда кечган. РФ Президенти матбуот котиби Дмитрий Песков айнан шу мазмунда баёнот бериб, мулоқотнинг ижобий натижасини ҳар икки етакчи эътироф этганига алоҳида урғу берган.

Унинг сўзларидан "Интерфакс" иқтибос келтиришича, "Бу айнан вазиятни барқарорлаштириш йўлларини топиш учун бундан кейин ҳам биргаликда қадам ташлаш имконини яратадиган учрашув" бўлган.

ОАВ вакилларининг матбуот анжуманида Президентлар нима учун саволларга жавоб бермагани билан боғлиқ тушунарсиз ҳолатни Песков "муайян баёнотлар берилди" дея мавҳум изоҳлади.

Табиийки, ўқувчилар учун Трампнинг хулосаси ҳам қизиқ. ВВС бу ҳақда шундай ёзган: Жуда кўп масалаларни келишиб олдик, айрим арзимас жиҳатларгина қолди. Умуман, ҳозирча якуний натижага эриша олмаган бўлсак-да, бизда келишув учун жуда яхши имконият бор.

Ғ.Хонназаров, ЎзА