Қуритилган мевалар энг фойдали озиқ-овқатлардан бири саналади. Боиси бундай маҳсулотлар тўғри қуритилганида ўзида барча витамин ва минералларни сақлаб қолади. Таркибидаги толалар ичакнинг ишлашига фойдали таъсир ўтказади ҳамда овқат ҳазм қилишни яхшилайди. Мамлакатимизда етиштирилаётган меваларнинг ўзига хос фойдали хусусиятлари дунё давлатларини ҳамиша жалб этиб келган.

Биргина ўрикнинг нақадар фойдали экани хусусида билмаган инсон бўлмаса керак. ITC (Trademap.org) маълумотларига кўра, 2024 йилда Туркия қуритилган ўрик импортида дунёда АҚШ, Германия, Франция, Буюк Британия, Нидерландия давлатларидан сўнг 6-ўринда қайд этилган.

Ўтган йили ушбу давлат умумий ҳисобда 5 002 тонна қуритилган ўрик импорт қилган бўлиб, бунинг учун 20,9 миллион АҚШ доллари сарфланган (ўртача 1 кг/4,18$). Ўсимликлар карантини ва ҳимояси агентлиги маълумотига кўра, Ўзбекистон 2024 йилда Туркияга қуритилган ўрик экспортида дунё бўйича 1-ўринни эгаллади. Бу натижа юртимиз экспорт салоҳиятининг ошиб бораётганидан далолат беради.

 Туркия давлатига қуритилган ўрик экспорт қилган топ-5 та давлат билан таништирадиган бўлсак, Ўзбекистон – 1 762 тонна (6,52 млн. $), кўрсатгич билан биринчи ўринда, Афғонистон – 1 020 тонна (3,5 млн. $) билан иккинчи ўринда, ундан сўнг Германия – 453 тонна (3,34 млн $), Тожикистон – 261 тонна (2,13 млн $) билан тўртинчи ўринда, Эрон – 200 тонна (1,03 млн. $). 

Рақамлардан англаш мумкинки, биргина Туркиянинг ўзида юртимиз маҳсулотлари бўлмиш ўрикка шунча эҳтиёж бор экан. Бу эса албатта қувонарли.

Абдулазиз РУСТАМОВ, ЎзА