Ватан учун, миллат учун, халқ учун!

Бугун истиқлол манзараларининг намоёни Ўзбекистон ёшларининг ҳаётида, фаолиятида, эришаётган натижаларида яққол акс этмоқда. Мустақиллигимизнинг ўтган, ўтаётган 34 йили ҳар бир юртдошимиз қатори минглаб, миллионлаб ёшлар учун катта қадамларга, улкан марраларга замин бўлди. Юрт ёшларига берилган ишонч ва умид, чексиз имкониятлар ва имтиёзлар ҳар бир йигит-қиз ҳаётида ўз сўзини айтмоқда.  

Ана шундай фаол ва иқтидорли ёшлардан бири, Олий Мажлис Қонунчилик палатаси ҳузуридаги Ёшлар парламенти раислигидан қуйи палата депутатлигигача бўлган йўлни босиб ўтган, ҳуқуқшунос, юридик фанлар бўйича фалсафа доктори, доцент Шаҳноза Жолдасова юртимизда ёшлар учун яратилаётган шарт-шароитлар, берилаётган имкониятлар ҳақида ўз фикр-мулоҳазаларини, кўнгил кечинмаларини изҳор этди:

– Талабалик йилларимизда бўш вақтларимизни мазмунли ўтказиш мақсадида сиёсий тадбирларда, парламент ҳаётида иштирок этишни хоҳлар эдик. Чунки ҳар бир юридик йўналишдаги инсон борки, сиёсий жараёнларга қизиқади. Аммо бунга ҳеч имкон бўлмасди. Сиёсий жараёнга ёшлар жалб этилмас эди.

Бугунги кунда эса бу тенденция бутунлай ўзгарди. Бугун давлатимиз раҳбари Шавкат Мирзиёев ташаббуси билан ёшларга катта ишонч билдирилмоқда, ёшлар сиёсий жараёнларга кенг жалб этилмоқда, қарорлар қабул қилишда ёшларнинг иштирокини таъминлашга алоҳида эътибор қаратилди. Президентимизнинг шахсий иродаси билан ёшларнинг нафақат қарорлар, балки қонунлар қабул қилишдаги иштирокини кенгайтириш мақсадида 2020 йилда парламентнинг ҳар иккала палатаси ҳузурида Ёшлар парламенти институти ташкил этилди.  

Мен қуйи палата ҳузуридаги Ёшлар парламентининг биринчи чақириғида бу тузилмага раис бўлганимдан жуда фахрланаман. Ёшлар парламенти ўтган давр мобайнида ёшларнинг сиёсий жараёнларга кириб келишида зинапоя вазифасини бажармоқда. Бугун ҳар бир фаол ёш парламент эшикларидан кириб келмоқда. Ёшлар парламенти аъзолари фракция йиғилишлари ва ялпи мажлисларда қатнашиш, қонун лойиҳалари муҳокамасида таклифлари билан иштирок этиш имконига эга бўлдилар. Бу ёшларга берилаётган катта имкониятдир.  

Мен ўзим ҳам мана шу Ёшлар парламенти орқали бугун Қонунчилик палатаси депутати бўлиш имкониятига эга бўлганимни алоҳида эътироф этаман. Ёшлар парламентига, сиёсатга қизиқувчи ёшлар сафи кенгаймоқда, сиёсий партияларга ўн минглаб ёшлар кириб келмоқда. Бугун “ёшлар сиёсатга аралашмасин” эмас, аксинча, уларни сиёсатга кенг жалб этиш жараёни фаоллашди. Бу умумхалқ референдуми ва ундан кейинги сайловлар жараёнида яна бир бор яққол намоён бўлди. Яъни, янги таҳрирдаги Конституциямизни қабул қилишда таклифларнинг 70 фоизи айнан ёшлар томонидан берилгани, энг катта тарғиботчи ёшлар бўлгани эътиборлидир.  

Мен оддий қорақалпоқ қизи сифатида икки буюк халқнинг фарзанди эканлигимдан фахрланаман. Хорижлик дўстларимиз депутатликка сайланганимда “наҳотки, сизларда ёшларни ҳам депутатликка қўйишадими” дея ҳайратланишган. Мен эса нафақат депутатлик, балки масъул лавозим ва вазифаларда ҳам кўплаб ёшлар ишлаётганини фахр билан айтганман.  

Албатта, буларнинг бари мамлакатимизда ёшларга берилаётган кенг имкониятлар самараси, ёшларга оид давлат сиёсатининг натижасидир.

PS: Ёш депутатнинг кечинмалари ва дил сўзлари билан батафсил қуйидаги видеоҳаволада танишишингиз мумкин.  

<iframe width="640" height="420" src="https://www.youtube.com/embed/wHaLCtyZ62w" title="Shahnoza Joldasova: deputatlikka saylanganimda xorijlik do‘stlarim hayratlanishgan" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳтарама Комилова,

Дониёр Якубов, Анвар Аҳмедов (видео), ЎзА