АҚШнинг Саинт-Луис шаҳрида бошланган “Saint Louis Rapid & Blitz 2025” халқаро турнирида дунёнинг энг кучли гроссмейстерлари қаторида ҳамюртимиз Нодирбек Абдусатторов ҳам дона сурмоқда.

Кеча мукофот жамғармаси 175 минг АҚШ долларидан иборат нуфузли мусобақанинг рапид йўналишидаги 3 та тур ўйинлари бўлиб ўтди.

Ўтказилган 1-тур ўйинида Абдусатторов қора доналарда АҚШ вакили Уэсли Со билан дурангга эришган бўлса, 2-турда яна бир америкалик Фабиано Каруанага имкониятни бой берди.

3-турда Левон Аронянга қарши ҳаракатланган Нодирбек ғалабали позицияга чиқиб олишга муваффақ бўлди. Аммо, баҳснинг сўнгги қисмларидаги қўпол хато ҳамюртимизнинг мағлубиятга учрашига олиб келган бўлса, Аронянга турнирда пешқадамликка эришишини таъминлади.

Бугун, 12 август куни халқаро турнирнинг иккинчи кунида Нодирбек Абдусатторов 4 ва 5-тур ўйинларини ўтказади. 4-турда у оқ доналарда асли россиялик, ҳозирда АҚШ шарафини ҳимоя қилаётган Григорий Опарин билан рўбарў келади. 5-турда Абдусатторов қора доналарда блиц бўйича жаҳон чемпиони, қитъа чемпионати ғолиби ветнамлик Льем Ле қаршилигини енгишга ҳаракат қилади.

Эслатиб ўтамиз, 17 августга қадар давом этадиган турнирда ғолибликка эришган шахматчи 40 минг АҚШ доллари билан тақдирланса, қолган 9 та ўриндан жой олганлар белгиланган тартибда мукофот пулларига эга чиқади.

Тўлқин Рўзиев, ЎзА