Аввал хабар берганимиздек, 2026 йилнинг 1-18 апрель кунлари Таиланд мезбонлигида қизлар ўртасида футбол бўйича U20 Осиё кубогининг финал босқичи бўлиб ўтади.

Унда қитъамизнинг 12 терма жамоаси уч гуруҳга бўлинган ҳолда ўзаро рақобатлашади. Гуруҳларда 1-2-ўринларни эгаллаган термалар тўғридан-тўғри чорак финал босқичига йўл олади. Ўз гуруҳида энг яхши натижа қайд этиб, 3-ўринга жойлашган икки жамоа ҳам 1/4 финал босқичи иштирокчисига айланади.  

Эътиборлиси, Осиё кубогининг чорак финал иштирокчилари 2026 йил 5-27 сентябрь кунлари Польшада ўтадиган жаҳон чемпионатига йўлланмани қўлга киритадилар.

Қувонарлиси, куни кеча Ўзбекистон U20 ёш тоифасидаги футболчи қизларимиз Осиё кубоги саралаш баҳсларининг “G” гуруҳида 7 очко билан биринчи ўриндан жой олиб, финал босқичига йўл олди. Бу эса Владимир Панов қўл остидаги терма жамоамизнинг жаҳон чемпионати сари яна бир қадам ташлаганидан далолат.  

Дарвоқе, Осиё кубоги саралаш баҳсларидан КХДР, Вьетнам, Австралия, Ҳиндистон, Хитой, Япония ва Жанубий Корея термалари гуруҳ ғолиби сифатида муваффақиятли ўтган бўлса, Иордания, Бангладеш ва Хитой Тайпейи терма жамоаси энг яхши натижа кўрсатган иккинчи ўрин соҳиби сифатида Осиё кубогига йўл олди.

Дарвоқе, келаси йилги Осиё кубогида Таиланд мезбон сифатида иштирок этади.

Осиё кубоги финалига қуръа ташлаш маросимида жамоалар саватчаларга қуйидагича жойлашади:

1 сават: Таиланд, Япония ва КХДР;

2 сават: Австралия,  Жанубий Корея, Хитой;

3 сават: Ўзбекистон, Хитой Тайпейи, Вьетнам;

4 сават: Иордания, Ҳиндистон, Бангладеш;

Жавоҳир Тошхўжаев,

ЎзА