Мактабгача ва мактаб таълими вазирлиги томонидан Президент соврини учун “Хорижий тилларни ўқитиш бўйича энг яхши мактаб” танловининг Республика босқичи совриндорларини тақдирлаш маросими ўтказилди.

Мактабгача ва мактаб таълими вазири Эъзоза Каримова мамлакатимизда Ўзбекистон Республикаси Президенти соврини учун ўтказилаётган ушбу маърифий танлов хорижий тилларни ўрганишга оид янги истиқболларни очаётганини таъкидлади.  

Танловда Қорақалпоғистон Республикаси, вилоятлар ҳамда Тошкент шаҳридан жами 14 та мактаб жамоаси (умумий 70 нафар ўқувчи) иштирок этди. Бунда танлов тарихида илк бор 13 та жамоа инглиз тили ва 1 та жамоа француз тили бўйича ўзаро беллашди.

Танлов миллий “Мультилевел” тести воситасида иштирокчиларнинг тинглаб тушуниш, ёзиш, гапириш ва ўқиш кўникмаларини синовдан ўтказиш орқали ташкил этилди.

Уч босқичда ўтказилган танловда республика бўйича жами 7 минг 952 та мактаб (жами 39 минг 760 нафар ўқувчи) қамраб олинган бўлиб, ўқувчиларнинг 38 минг 255 нафари инглиз, 875 нафари немис, 630 нафари француз тили бўйича иштирок этишди.

Танловнинг биринчи босқичи якунига кўра, республика бўйича 208 та туман ва шаҳар мактаблари ҳудудий босқичга, иккинчи босқич якунларига кўра, 14 та мактаб финал босқичига тавсия этилди.

[gallery-24689]

Тест топшириқлари иштирокчиларнинг мулоқот кўникмаларини босқичма-босқич ривожлантиришга қаратилган. Хусусан, танловнинг вилоят босқичи синов материалларида иштирокчиларнинг эшитиш ва ёзиш компетенцияларини баҳолашга урғу берилди. Бунда иштирокчиларнинг лексик-грамматик билимлари билан бирга, рецептив ва продуктив нутқий кўникмалари ҳам текширилди.

Танловнинг республика босқичида ғолиб бўлган жамоалар:

1-ўрин учун – 500 миллион сўм;

2-ўрин учун – 400 миллион сўм;

3-ўрин учун – 300 миллион сўм миқдорида пул мукофотини қўлга киритади.  

Шунингдек, республика босқичи иштирокчилари ва уларнинг устозлари хорижий давлатга таълим саёҳати йўлланмасига эга бўлади.  

"Хoрижий тилларни ўқитиш бўйича энг яxши мактаб" танлoвининг Республика бoсқичида 1-ўринни Наманган вилoятининг Янгиқўрғoн туманидаги 10-мактаб жамoаси қўлга қиритди. 2-ўрин Навoий вилoятининг Зарафшoн шаҳридаги 3-мактаб жамoасига насиб этди. 3-ўринга Сирдарё вилoятининг Ширин шаҳридаги 2-мактаб жамoаси лойиқ кўрилди .

–Биз мазкур танловда бир неча йилдан буён қатнашиб келамиз, – деди Наманган вилоятининг Янгиқўрғoн туманидаги 10-мактаб инглиз тили ўқитувчиси Саида Норбоева. – Танлов холис ва шаффоф ўтди. Ўтган йиллар давомида иккинчи ва учинчи ўринларни қўлга киритган эдик. Бундай танловлар мактабнинг моддий-техника базасини мустаҳкамлаш учун қулай имконият.

Н.Усмонова,
Н.Ҳайдаров (сурат),
ЎзА