OpenAI компанияси ChatGPTʼ хизматида фойдаланувчиларнинг ўқув жараёнини яхшилашга қаратилган янги функцияни – “Ўқув режими” (Study Mode)ни тақдим этди. Бу режим, айниқса, билимларни чуқурроқ тушуниш ва мустаҳкамлаш истагида бўлганлар учун мўлжалланган. Энди ChatGPT нафақат жавоб берувчи сунъий интеллект, балки рақамли репетитор сифатида ҳам хизмат қилмоқда.
“Ўқув режими” нималарни таклиф этади?
Янги функция фойдаланувчиларга тайёр жавобни тақдим этишдан кўра, мавзуни босқичма-босқич таҳлил қилиш, саволлар устида мустақил фикрлаш ва ечим топишга йўналтириш имконини беради. Бу орқали фойдаланувчи ўз билимини чуқурлаштиради ва мавзуни яхшироқ ўзлаштиради.
Режим ишга туширилганда, ChatGPT фойдаланувчидан қайси услубда ўрганишни афзал кўришини (масалан, визуал изоҳлар, амалий топшириқлар, савол-жавоблар орқали) жорий билим даражасини ва мақсадларини аниқлаштиришни сўрайди.
Шу асосда, сунъий интеллект мослашувчан тарзда ўргатишни бошлайди. Фойдаланувчининг ўрганиш услуби ва мақсадларига мос келувчи тавсиялар, саволлар ёки топшириқларни таклиф қилади.
“Ўқув режими” барча ChatGPT фойдаланувчилари учун мавжуд – бепул версия, Plus, Pro ва Team тарифларида. ChatGPT Edu таълимий версиясига эса ушбу функция яқин ҳафталарда қўшилади.
OpenAI вакилларининг таъкидлашича, бу функция ўқувчиларга: уй вазифаларини бажаришда, имтиҳонларга тайёргарлик кўришда ва янги мавзуларни ўрганишда сезиларли ёрдам беради.
Режим таълим соҳаси мутахассислари билан ҳамкорликда ишлаб чиқилган бўлиб, бу ChatGPTни ривожланган ўқув ёрдамчисига айлантириш йўлидаги биринчи босқич ҳисобланади. ChatGPT ва унга ўхшаш технологияларнинг жорий этилиши ўз таъсирини кўрсатмоқда. Жумладан, ChatGPT ишга туширилганидан сўнг, Буюк Британияда битирувчилар ва амалиётчилар учун мавжуд бўлган бўш иш ўринлари сони 31,9% га қисқаргани ҳақида хабар берилган. Бу сунъий интеллектнинг таълим ва бандлик соҳаларига қанчалик кучли таъсир кўрсатаётганини кўрсатади.
<iframe width="560" height="315" src="https://www.youtube.com/embed/6cCEx1WAzkk?si=Ld6Vacjjpnb-pWAb" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Мадинабону Насриева, Анвархўжа Аҳмедов, ЎзА