Futbol bo‘yicha O‘zbekiston Superligasining ikkinchi davra bahslari bugun boshlanadi va 3 avgust kuniga qadar davom etadi. Ilk kungi bahslarda "Buxoro" – OKMK va "Mash’al" – "Paxtakor" jamoalari o‘zaro raqobatlashadi.

Milliy chempionatimizning 16-turidan o‘rin olgan "Mash’al" – "Paxtakor" uchrashuvi oldidan ushbu jamoalarning o‘zaro o‘yinlar statistikasini yodga olsak. Ushbu klublar chempionatlarda jami 39 ta uchrashuvda to‘qnash kelgan. Ularning 28 tasida "Paxtakor", 5 tasida "Mash’al" zafar quchgan. 6 ta o‘yin durang bilan yakunlangan. To‘plar nisbati 81/25 - “sherlar” foydasiga. Shuni ta’kidlab o‘tish lozimki, “Paxtakor” safarda o‘tgan 19 bellashuvning 10 tasida g‘alaba, 5 tasida durang qayd etgan. 

"Mash’al" va "Paxtakor" jamoalari o‘rtasida bugungi o‘yin G‘uzordagi "Markaziy" stadionda soat 20:00da boshlanadi.

Eslatib o‘tamiz, Superliga bahslarining 15-tur yakunlariga ko‘ra, “Nasaf” 33 ochko bilan karvonboshilik qilmoqda. “Neftchi” 30, “Dinamo” esa 29 ochko bilan kuchli uchlikni yakunlab bergan.

Javohir Toshxo‘jayev, O‘zA