Саудия Арабистонининг Тоиф шаҳридаги Green Mountain Park боғида “360 даража” номли аттракцион одамлари билан бирга қулаб тушди. Маълумотларга кўра, ҳодиса вақтида аттракционнинг марказий таянчи иккига бўлиниб кетган ва ундаги одамлар кучли зарба билан ерга қулаган. Камида 23 киши тан жароҳати олган, уларнинг айримлари оғир аҳволда. Ҳодисанинг аниқ санаси ошкор этилмаган, бироқ унга оид видео лавҳалар 31 июль куни ижтимоий тармоқларда тарқалган.

Эрон аҳолиси 2025 йилнинг иккинчи чорагида олтин харид қилишни кескин кўпайтирди. Бу ҳақда Жаҳон олтин кенгаши 31 июль куни эълон қилган ҳисоботида маълум қилди. Маълумотларга кўра, 12 кун давом этган Эрон—Исроил уруши фонида мамлакатда олтинга талаб жуда ошиб кетган. Нархлар юқорилигига қарамай, умумий олтин савдоси ҳажми 2024 йилнинг шу даврига нисбатан 20 фоизга кўпайган. Олтин танга ва ёмби (қуйма олтин бўлаги)ларга талаб сўнгги 6 йилдаги энг юқори даражага етган. Дунё бўйича эса, 2025 йилнинг иккинчи чорагида олтин танга ва қуйма харидига талаб биринчи чоракка нисбатан 6 фоизга камайган.

АҚШнинг Теннесси штатида 1994 йилда музлатилган эмбриондан соғлом чақалоқ туғилди. Чақалоқнинг биологик эмбриони 1990 йилларда Линда Арчерд исмли аёл томонидан ЭКО (сунъий уруғлантириш) орқали яратилган. Аёл ўша пайтда олти йил давомида ҳомиладор бўла олмаган. 1994 йил май ойида шифокорлар тўртта эмбрион яратишга муваффақ бўлган. Улардан бири Линда бачадонига кўчирилган, шундан сўнг аёл соғлом қиз фарзанд дунёга келтирган. 

Японияда бутун кузатувлар тарихидаги энг иссиқ кун қайд этилди. 30 июль куни Тамба шаҳрида ҳарорат 41,2 даражага етди. Бу ҳақда Reuters хабар берди. Бу кўрсаткич мамлакатда 2018 йилда ўрнатилган ва 2020 йилда такрорланган аввалги 41,1 даражалик ҳарорат рекордидан ошиб кетди. Ўтган ҳафта Японияда 10,8 мингдан ортиқ одам иссиқлик уриши билан касалхонага ётқизилган, 16 киши эса иссиқдан вафот этган.

Жанубий Кореяда 2025 йилнинг ёз ойларида жазирамадан вафот этганлар сони 13 нафарга етди. Бу ҳақда мамлакат соғлиқни сақлаш расмийлари 30 июль куни маълум қилди. Корея касалликларни назорат қилиш ва олдини олиш агентлиги (KDCA) маълумотларига кўра, 2025 йил май ойининг ўрталаридан буён 2768 нафар фуқаро қуёш уриши симптомлари билан шошилинч тиббий ёрдамга мурожаат қилган, уларнинг 13 нафари вафот этган.

Россиянинг Узоқ Шарқида жойлашган Камчатка яриморолидаги “Ключевская Сопка” вулқони 8,8 магнитудали кучли зилзиладан сўнг отилишни бошлади. Бу ҳақда Россия Фанлар академиясига таяниб Anadolu хабар берди.

Дастлабки маълумотларга кўра, вулқоннинг ғарбий ён бағрида қайноқ лава оқими кузатилмоқда. Ҳудудда кучли ёруғлик, чақнаш ва аланга қайд этилмоқда. Россия ҳукумати яриморолдаги мактабларга ўқув жараёнини вақтинча тўхтатиб туришни буюрган.

<iframe width="650" height="420" src="https://www.youtube.com/embed/wu1x2Hq6t5k" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА