Греция пойтахти Афина шаҳрида спорт курашлари бўйича U17 ёш тоифасида ўтказилаётган жаҳон чемпионатида юнон-рум кураши баҳслари ўз якунига етди.

Унда 51 килограммгача вазнда мамлакатимиз шарафини ҳимоя қилган Отабек Турсунов сўнгги ҳал қилувчи финал беллашувида озарбайжонлик Ҳикмат Ҳагвердиевни 4:1 ҳисобида енгган бўлса, -71 кг. вазндаги полвонимиз Беҳрузбек Валиев грециялик Димитриос Соулис устидан  3:1 ҳисобида зафар қучди.

Шу тариқа, Отабек ва Беҳрузбек терма жамоамизга иккита олтин медални тақдим этди. Натижада Ўзбекистон терма жамоаси 4 та олтин медални қўлга киритган ҳолда умумжамоа ҳисобида иккинчи бўлди. Эслатиб ўтамиз, куни кеча юнон-рум кураши бўйича Бунёд Ҳасанов  ва Абдулазиз Холмирзаев ҳам жаҳон чемпионига айланган эди.  

Аёллар кураши бўйича вазни - 65 кг. бўлган Муҳайё Раҳимжонова финал босқичига йўл олди. Энди Муҳайё олтин медаль учун ўтадиган сўнгги баҳсда Ашвини Вишнои билан куч синашади.

Жавоҳир Тошхўжаев,

ЎзА