Россиянинг Камчатка яримороли соҳилида 8,7 балли зилзила содир бўлди. Оролнинг шарқий соҳилига 3–4 метр баландликдаги цунами тўлқинлари урилди. Бу ҳақда АҚШ Геологик хизматига таяниб BBC хабар берди. Россия Фанлар академияси Геофизика хизматига кўра, зилзила маркази Петропавловск-Камчатский шаҳридан 136 километр шарқда, 18 километр чуқурликда қайд этилган. Зилзила сабаб Тинч океанининг шимолий қирғоқлари — Калифорниягача бўлган ҳудудларда баландлиги 3 метргача етиши мумкин бўлган цунамилар кузатилиши прогноз қилинмоқда.

Камчатка яриморолидаги 8,7 балли кучли зилзилага қарамай, шифокорлар беморни операция қилишни давом эттирди. Бу ҳақда “РБК” хабар берди. Шифокорлар зилзила пайти онкологик диспансерда жарроҳлик амалиётини бажараётган бўлган. Камчатка соғлиқни сақлаш вазири Олег Мельниковга кўра, улар “хотиржамликни сақлаб, охиригача беморнинг ёнида бўлган”.

Turkish Airlines авиакомпаниясининг Истанбулдан Анталияга учаётган самолёти учиш-қўниш йўлагида тутай бошлади. Йўловчилар зудлик билан эвакуация қилинди. Ижтимоий тармоқларда аэропортдаги вазиятни акс эттирувчи видеолар тарқалди. Boeing 777 самолёти Анталия аэропортига қўнгандан сўнг шассисидан тутун чиқишни бошлаган. Авиакомпания йўловчилар хавф остида қолмагани, бироқ эҳтиёт чораси сифатида самолётдан эвакуация қилинганини айтди.

Украина президенти Владимир Зеленский 29 июль куни 60 ёшдан ошган фуқароларга ҳарбий ҳолат даврида армияга ихтиёрий тарзда қўшилишга рухсат берувчи қонунни имзолади. Янги қонунга кўра, катта ёшли кўнгиллилар жанговар бўлмаган ҳамда ихтисослаштирилган лавозимларда хизмат қилишлари мумкин бўлади. Бу Россия билан давом этаётган уруш фонида ҳарбийлар етишмовчилигига дуч келаётган Украина армияси учун катта имконият яратади.

Эрон Марв (Туркманистон) ва Душанбе (Тожикистон) шаҳарларига темирйўл қатновларини йўлга қўймоқчи. Бу ҳақда Эрон миллий темирйўл компанияси бош директори хабар берди. Янги йўналишлар Эроннинг транспорт инфратузилмасини замонавийлаштириш ва минтақавий ҳамкорликни кучайтириш стратегиясининг бир қисми ҳисобланади.

Директор Эронни Туркия, Афғонистон ва Марказий Осиё мамлакатлари билан боғлайдиган иккита янги темирйўл йўналиши тез орада ишга туширилишини айтди.

<iframe width="650" height="420" src="https://www.youtube.com/embed/It5EwDYGDs4" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА