ЖССТ маълумотига кўра, ҳар йили дунёда 325 миллионга яқин одам гепатит Б вируси ва камида 200 миллион киши гепатит C вируси билан касалланмоқда. 2020 йилги маълумотларга кўра, ҳар йили 500-700 минг киши гепатит Б инфекцияси, 350 мингдан ортиқ бемор гепатит C асоратлари туфайли вафот этади. Бутунжаҳон гепатит алянсининг 2021 йил июль ойидаги маълумотларига кўра, гепатит Б ва C вируси сабабли ҳар йили 1,4 миллион одам вафот этади. Бу эса ОИВ/ОИТС ва безгакдан кўпроқ деганидир.
Бугун ушбу касалликка қарши курашиш ва унинг олдини олиш борасида мамлакатимизда кўплаб чора-тадбирлар олиб борилмоқда.
Хусусан, статистикага кўра, 2023 йилда миллиондан ортиқ юртдошимиз скринингдан ўтказилган ва касалликнинг юзлаб янги ҳолатлари аниқланган. 28 июль куни Тошкентда ўтказилган матбуот анжуманида мутахассислар “Вирусли гепатит билан курашишнинг энг самарали йўли — эрта ташхис ва профилактика” эканлигини таъкидладилар.
Мулоқот давомида шунингдек, миллиондан ортиқ аҳолига ўтказилган скрининг натижалари эълон қилинди. Қайд этилишича, Ўзбекистон Президентининг тегишли қарори доирасида юртимиздаги 65 дан зиёд оилавий ва кўп тармоқли марказий поликлиникаларда ушбу касалликни аниқлаш учун бепул скрининг ташкил этилган ва 2025 йил 30 июнь ҳолатига республикада аҳолининг 1 595 589 нафари вирусли гепатит “В” турига, гепатит “С” турига эса 1 595 760 нафар шахслар скринингдан ўтказилган.
Натижага кўра, Республикада вирусли гепатит “В” турига скринингдан ўтказилган аҳолининг 43 679 нафарида (2,7 фоизида) мусбат натижа, 52 834 нафарида эса вирусли гепатит “С” турига мусбат натижа аниқланган. Ва, ушбу шахсларни даволаш мақсадида 97 765 та қадоқдан Софосбувир ва Даклатасвир вирусга қарши дори воситалари ҳудудларга тақсимланиб, 20 120 та беморларга тарқатилган.
Бундан ташқари, касаллик юқиши хавфи юқори бўлган шахслар, шу жумладан, қон ва унинг таркибий қисмлари билан ишловчи жами 119 013 минг нафар тиббиёт ходимлари гепатит “В” инфекциясига қарши эмланган ва эмланганлик тўғрисидаги маълумотлар шакллантирилган.
Ҳозирги кунда эса Миср Араб Республикаси томонидан беғараз ёрдам сифатида юборилган гепатит Сга қарши 60 000 қадоқ Даклатасвир ва 7 000 қадоқ Софосбувир дори воситалари гепатит С тури аниқланган беморларга бепул тарқатилмокда. Маълумот учун, Гепатит Сга қарши дориларга 4 йил учун Давлат томонидан 47 млрд. сўм маблағ ажратилади.
Матбуот анджумани якунида мутахассислар ОАВ вакиллари томонидан йўлланган саволларга жавоб бердилар.
<iframe width="650" height="420" src="https://www.youtube.com/embed/AIJcWeQJtuM" title="Gepatitga qarshi global kurash: O‘zbekiston qanday choralar ko‘rmoqda?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>М.Эшмирзаева, А.Содиқов, У.Тўхтаев, ЎзА