Qirg‘izistonning Cho‘lpon-Ota shahrida shaxmat bo‘yicha 18 yoshgacha bo‘lgan yoshlar o‘rtasida yakunlangan navbatdagi Markaziy Osiyo chempionatida O‘zbekiston terma jamoasi umumjamoa hisobida 1-o‘rinni egalladi.

8 yoshdan 18 yoshgacha bo‘lgan o‘smirlar va qizlar o‘rtasida o‘tgan  chempionatda 5 davlatdan 425 nafar iqtidorli yosh shaxmatchilar ishtirok etdi. Bahslarda terma jamoamiz a’zolari 9 ta turdan iborat o‘yinlar sarhisobiga ko‘ra, 6 ta oltin, 4 ta kumush va 6 ta bronza, jami 16 ta medalga egalik qildi.

Mehribonu Nazirqulova, Abduqodir Bahodirov, Alisher Abduqayumov, Temur Shavkatov, Jahongir Dilmurodov, Fazliddin Farhodov singari shaxmatchilarimiz o‘z yosh toifalarida g‘olib va sovrindorlikka erishdi.

Umumjamoa hisobida hamyurtlarimiz 6 ta oltin, 4 ta kumush va 6 ta bronza medali bilan g‘oliblikni tantana qilgan bo‘lsa, keyingi pog‘onalardan Turkmaniston, Qirg‘iziston, Qozog‘iston, Tojikiston vakillari joy egalladi.

T.Ro‘ziyev,

O‘zA