Шимолий Корея етакчиси Ким Чен Иннинг синглиси Ким Ё Чжон Жанубий Корея президенти Ли Чже Мённинг ярашишга қаратилган саъй-ҳаракатларини рад этди. Бу ҳақда Шимолий Корея давлат оммавий ахборот воситаларига таяниб Al Jazeera хабар берди. Маълум қилинишича, Ким Ё Чжон Жанубий Кореянинг чегарада ташвиқот эшиттиришларини тўхтатиш қарорини “илгари қилмаслик керак бўлган ишни вақтинча бекор қилиш” дея изоҳлаган.
Туркиянинг шимоли-ғарбий қисмида жойлашган тўртинчи йирик шаҳри — Бурса ўрмон ёнғинлари қуршовида қолди. Ҳудудда юз берган ёнғинлар оқибатида камида 1 700 дан ортиқ аҳоли хавфсиз жойга эвакуация қилинди, бир нафар ўт ўчириш ходими ҳалок бўлди. Бу ҳақда Anadolu хабар берди. Бурса ҳокимлигига кўра, 28 июль куни 1 765 нафар одам хавфсиз жойга эвакуация қилинган. Ёнғинларга қарши курашда 1 900 дан ортиқ ўт ўчирувчи ва 500 нафар қутқарувчи жалб этилган.
Германиянинг Ридлинген шаҳарчаси яқинида 27 июль куни йўловчи поезд рельсдан чиқиб кетди. Оқибатда 3 киши ҳалок бўлиб, яна бир неча йўловчи оғир жароҳат олди. Бу ҳақда маҳаллий полицияга таяниб BBC хабар берди. Аён бўлишича, ҳалокат 27 июль куни кечки пайт Штутгарт яқинидаги Ридлинген шаҳарчаси ҳудудида содир бўлган. Воқеа сабабига ҳали аниқлик киритилмаган, аммо ҳалокат олдидан ҳудудда кучли бўрон кузатилгани айтилмоқда.
Жанубий Кореяда яшаётган хорижликлар сони 2025 йил июнь ойида рекорд кўрсаткич — 2,73 миллионга етди. Уларнинг учдан бир қисмини хитойликлар ташкил қилмоқда. Бу ҳақда Anadolu хабар берди. Маълумотларга кўра, июнь ойи охирига келиб мамлакатда 1,56 миллион нафар рўйхатдан ўтган хорижлик, шунингдек, 552 419 нафар хориж фуқаролигига эга корейс миллатига мансуб шахслар бўлган. Бундан ташқари, 620 мингдан ортиқ одам Жанубий Кореяда қисқа муддатли — асосан сайёҳлик визаси билан вақтинча яшамоқда.
Сербия Марказий банки мамлакатга тегишли барча олтин захираларини ўз ҳудудига қайтаришни режалаштирмоқда. Бу қарор глобал инқирозлар фонида захираларни хавфсиз сақлаш мақсадида қабул қилинди. Бу ҳақда EuroАsia Daily хабар берди. Сербия олтин захираларини қайтариш ишларини 2021 йилда, глобал беқарорлик кучайган пайтда бошлаганди.
Таиланд ва Камбоджа ўтган ҳафтада бошланган можарога чек қўйиш учун душанба куни Малайзияда музокаралар бошлашга келишиб олди. 24 июль куни чегарада ҳарбий ҳаракатлар бошланганидан бери камида 33 нафар аскар ва тинч аҳоли вакиллари ҳалок бўлган, икки томондан 200 мингдан ортиқ киши ўз уйларини тарк этишга мажбур бўлган.
«Аэрофлот» ахборот тизимларида йирик носозлик рўй берди. Бунга хакерлар ҳужуми сабаб бўлгани айтилмоқда. Авиакомпания рейслар қолдирилиши ёки бекор қилиниши мумкинлигидан огоҳлантирди.
«Аэрофлот»нинг маълум қилишича, ахборот тизимидаги носозлик туфайли Москвадан амалга оширилиши керак бўлган 49 та рейс бекор қилинган. Москванинг Шереметьево аэропортида улкан навбатлар юзага келган.
<iframe width="650" height="420" src="https://www.youtube.com/embed/y5bbDdjJzRM" title="XALQARO DAYJEST" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА