Олий Мажлис Сенати Раиси Танзила Норбоева бошчилигидаги Ўзбекистон делегацияси Швейцариянинг Женева шаҳрида Парламентлараро Иттифоқ (ПИ)га аъзо давлатлар парламентлари аёл спикерларининг инклюзив ва узоқ муддатли тинчлик йўлида етакчилик мавзусига бағишланган 15-саммитида иштирок этмоқда.

Мазкур халқаро платформа парламентларнинг спикер аёлларини, шунингдек, инклюзивлик, тинчлик ва барқарор тараққиётни илгари суришга ҳисса қўшаётган нуфузли халқаро экспертларни бирлаштирди.

Саммит дастури хотин-қизларнинг тинчлик ва хавфсизликни таъминлашдаги ролини, шу жумладан, БМТ Хавфсизлик кенгашининг 1325-сонли резолюциясини амалга ошириш нуқтаи назаридан муҳокама қилишни, шунингдек, иқлим ўзгариши, сунъий интеллектни ривожлантириш, гендер ва ирқий асосдаги онлайн зўравонлик каби замонавий таҳдидларни кўриб чиқишни назарда тутади.

Саммитнинг биринчи сессияси доирасида “Аёллар, тинчлик ва хавфсизлик” кун тартибининг 25 йилдан кейинги натижалари ва истиқболлари – сақланиб қолаётган таҳдидлар ва ривожланиш йўллари муҳокама қилинади.  

Иккинчи сессияда иштирокчилар янги глобал таҳдидларни енгиб ўтиш йўлларини кўриб чиқади ва муваффақиятли тажриба алмашади.

Дебатлар ҳам бўлиб ўтади, уларда спикер аёллар гендер тенглик ва рақамли хавфлар билан боғлиқ долзарб масалалар бўйича ўз фикрини билдиради.

Саммит доирасида Олий Мажлис Сенати Раисининг сўзга чиқиши ва икки томонлама учрашувлар ўтказиш режалаштирилган.

Н.Абдураимова,

ЎзА