Бугун Россия ва Украина ўртасидаги ҳаво ҳужумларида жами беш киши ҳалок бўлди, деб ёзмоқда “BBC” нашри.

Расмий Киев РФ томонидан 200 дан ортиқ дрон ва 30 га яқин ракета учирилганини, уларнинг аксарияти Днепропетровскка қаратилгани ва ҳужумлар оқибатида уч киши ҳаётдан бевақт кўз юмгани ҳақида маълум қилди.

Россиянинг Ростов вилояти губернатори сўзларига кўра, Украина учувчисиз самолёти ҳужуми ортидан мазкур ҳудудда кўплаб автомобиллар ёниб кетган ва икки киши ҳалок бўлган.

Қизиқ жиҳати, Россия Украина шарқидаги иккита қишлоқни эгаллаб олганини даъво қилган бўлса, Украина президенти Владимир Зеленский украин қўшинлари рус ҳарбийларини Суми вилоятидан “аста-секин сиқиб чиқараётганини” айтмоқда.

Зеленскийнинг таъкидлашича, Россия дронлари Харьков ва Сумини ҳам нишонга олган бўлган. 

– Днепропетровскда зарбалар натижасида олти киши яраланди, - деди вилоят раҳбари. – Днепр шаҳрида баъзи турар-жой массивлари ва савдо марказига жиддий зарар етди.

Шунингдек, бугун Россия Мудофаа вазирлиги Донецк вилоятидаги “Зелений Хай” ва Днепропетровск вилоятидаги “Маливка” қишлоқларини эгаллаб олганини билдирди. 

– Биз рус қўшинларининг Суми вилоятига чуқурроқ кириб боришига доимий равишда тўсқинлик қиляпмиз, -деди Украина етакчиси.

Шунингдек, Зеленский шу ҳафта ичида Донецкнинг Покровск ҳудудида “51 та шиддатли жанговар ҳаракатлар” бўлиб ўтганини ва у ерда қўшинлар позицияларни муносиб ҳимоя қилаётганини айтди.

Маълумки, Россия – Украина ўртасида ўт очишни тўхтатиш бўйича музокараларнинг дастлабки икки раунди АҚШ президенти Дональд Трамп илтимосига кўра май ва июнь ойларида ўтказилган эди.

Афсуски, ҳафта бошида Истанбулда ўт очишни тўхтатиш бўйича қисқа музокараларнинг учинчи раунди бўлиб ўтганига қарамай, ҳар икки томон яна дрон ҳужумларини уюштиришда давом этмоқда.

Ўткир ХОН, ЎзА