Португалияда байдарка ва каноэда эшкак эшиш бўйича U18 ва U23 ёш тоифаларида жаҳон чемпионати ўтказилмоқда. Унда дунёнинг 20 та давлати қаторида Ўзбекистон терма жамоаси аъзолари ҳам иштирок этмоқда.

Чемпионатнинг U23 ёш тоифасидаги К-1 йўналишида 1000 метр масофага кечган беллашувларнинг финалида Арина Танатмишева 4 дақиқа 5,97 сония натижа билан маррага иккинчи бўлиб етиб келди ва терма жамоамиз ҳисобига дастлабки кумуш медални келтирди.  

Шунингдек, мусобақанинг турли йўналишларида бир қатор эшкак эшувчиларимиз финал босқичида иштирок этиш ҳуқуқини қўлга киритди.

Мусобақанинг кечаги кун якунларига кўра, ҳар иккала ёш тоифаларида медаль жамғаришда Венгрия терма жамоаси 3 та олтин, 4 та кумуш ва 1 та бронза билан пешқадамлик қилмоқда. Италия эса 2 олтин, 1 тадан кумуш ва бронза билан иккинчи, Сербия термаси эса 2 та олтин ҳамда 1 та бронза билан кучли учликдан жой олган.

Жавоҳир Тошхўжаев, ЎзА