Франция президенти Эммануэль Макрон сентябрь ойида Фаластин давлатини расман тан олишини маълум қилди. Бу ҳақда BBC хабар берди. Франциянинг Фаластинни тан олиши ҳақида Макрон сентябрь ойида бўлиб ўтиши режалаштирилган БМТ Бош ассамблеяси сессиясида расман эълон қилинишини айтган. Бу билан Франция G7 давлатлари ичида Фаластин давлатчилигини тан олган биринчи мамлакат бўлади.
Исроил ва АҚШ делегацияси Қатар пойтахти Доҳада бўлиб ўтаётган Ғазода ўт очишни тўхтатиш музокараларини тарк этди. Бу ҳақда BBC хабар берди. Вашингтон тарк этиш қарорини ХАМАСнинг “яхши ниятда ҳаракат қилмаётгани” билан изоҳлади. “Биз ХАМАСнинг Ғазода ўт очишни тўхтатишга эришиш истаги йўқлигига амин бўлдик. Шундан сўнг жамоамизни Доҳадан уйга қайтариб олиб кетишга қарор қилдик”, деди АҚШнинг махсус элчиси ўз баёнотида.
SpaceX компаниясининг Starlink сунъий йўлдош интернет хизмати 2,5 соат давом этган узилиш сабаб бутун дунё бўйлаб ўз фойдаланувчиларига хизмат кўрсата олмади. Компания буни ички дастурий хизматдаги носозлик билан изоҳлади. Starlink дунё бўйлаб 140 дан ортиқ мамлакатда истиқомат қилувчи 6 миллиондан зиёд фойдаланувчига хизмат кўрсатадиган интернет тармоғидир. У пайшанбадан жумага ўтар кечаси куни глобал узилишларга дуч келди. Натижада миллионлаб инсонлар тахминан икки ярим соат давомида унинг хизматларидан фойдалана олмади. Бу айниқса, Украина армияси жанговар имкониятларига салбий таъсир қилди.
Украина Қўшма Штатлардан 322 миллион долларлик қурол-яроғ сотиб олади. АҚШ давлат департаменти томонидан 23 июль куни тасдиқланган пакет ҳаво ҳужумидан мудофаа ва қуруқлик техникаларни ўз ичига олади. Бу ҳақда AP News хабар берди. АҚШ Конгрессига юборилган хабарнома матнига кўра, Қўшма Штатларда ишлаб чиқарилган зирҳли техникаларни сотиб олиш, техник хизмат кўрсатиш, таъмирлаш ва модернизация қилиш учун 150 миллион доллар, зенит-ракета тизимлари учун эса 172 миллион доллар ажратилган. Умумий олганда, пакетнинг қиймати 322 миллион долларни ташкил этади.
Россияда туғилиш даражаси сўнгги икки асрдаги минимумга тушди. Расмийлар муаммони бартараф этиш учун қатор радикал чораларни илгари сурмоқда. “Демографик махсус кучлар” бўлинмасини тузиш, бўйдоқ эркакларни фронтга юбориш кабилар шулар жумласидан. Федерация Кенгаши спикери Валентина Матвиенконинг маълум қилишича, эндиликда ҳар бир ҳудудда “демография учун масъул раҳбар” бўлади. Улар “оилавий қадриятларни устувор қилиш бўйича давлат сиёсати”га жавоб беради.
АҚШ давлат департаменти Миср ҳукуматига умумий қиймати қарийб 5 миллиард доллар бўлган “ер-ҳаво” ракета тизимларини сотишга розилик берди. Бу ҳақда Пентагонга таяниб Al-Jazeera маълум қилди. Хабар қилинишича, Қоҳира битим доирасида NASAMS ҳаво мудофаа тизимлари, жумладан, тўртта радар комплекси, юзлаб ракеталар ва учириш қурилмаларини олади.
<iframe width="560" height="315" src="https://www.youtube.com/embed/lhPXoUGPRdQ?si=tSW8DeNtkHNFGfuz" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА