Германиянинг бир қатор шаҳарларида давом этаётган XXXII Бутунжаҳон ёзги Универсиада ўйинларида Ўзбекистон спорт делегацияси 3 та олтин, 4 та кумуш, 7 та бронза медали билан 150 га яқин давлат орасида 11-ўринни эгаллаб турибди.

Бугун, 25 июль куни ўйинлар дастуридан ўрин олган 13 та спорт йўналишида мусобақалар ўтказилса, 6 та спорт турида ғолиб ва совриндорлар аниқланиши кутилмоқда. 

Дунёнинг 8 минг 500 нафардан зиёд спортчи-талабалари иштирокида давом этаётган ёзги Универсиада ўйинларининг бугунги баҳсларида мамлакатимиз талаба-дзюдочилари ғолиблик учун кураш олиб боради. 

Хусусан, терма жамоамиз аъзоси Маржона Кўчимова -78 килограммда, Ирисхон Қурбонбоева +78 килограммда, Нурбек Муртазоев -90 килода, Муҳаммадсодиқ Содиқов -100 килода ва Исломбек Равшанқулов +100 килода Ватанимиз шарафини ҳимоя қилади. 

Эслатиб ўтамиз, Универсиада ўйинларининг ўнинчи кунги баҳслари олдидан АҚШ делегацияси 28 та олтин, 20 та кумуш ва 25 та бронза медали билан умумжамоада етакчилик қилмоқда. 

XXXII Бутунжаҳон ёзги Универсиада ўйинларининг тантанали ёпилиш маросими 27 июль куни ташкил этилади. 

Т.Рўзиев, ЎзА