Хитойда ҳар икки йилда бир марта ташкил этиладиган нуфузли “Ўткир тиғ-2025” халқаро снайперлар мусобақасида Ўзбекистон Миллий гвардияси жамоаси ғалабани қўлга киритди.

Урумчи шаҳрида ўтказилган мазкур мусобақада Ўзбекистон жамоаси Хитой, Вьетнам, Жанубий Корея, Россия, Испания, Қирғизистон, Қозоғистон, Индонезия ва Венгрия каби мамлакатлар жамоалари билан 4 йўналишда куч синашди. 

Мусобақанинг энг мураккаб ва ўта масъулиятли босқичларида Миллий гвардиямиз снайперлари ўз маҳоратлари билан алоҳида ажралиб турди. Хусусан, мажмуавий отиш машқида (1200 метр масофадаги 7 позициядан туриб 24 та нишонни йўқ қилиш) ва шаҳар шароитидаги баланд бинодан отиш машқида (мерганлар жуфтлигида 100-650 метр масофадаги 6 нишон) Ўзбекистон жамоаси барча иштирокчилар ичида энг юқори натижаларни қайд этди. 

Айниқса, “100 метр узоқликдаги ипга осилган ханжарни узиш” машқи бўйича ҳам фақат Ўзбекистон мерганлари муваффақиятли натижа қайд этиб, мусобақа рамзи ҳисобланган ханжарни қўлга киритди. 

Ўзбекистон Миллий гвардиясининг 4 нафар мергани мусобақа якунига кўра умумий ҳисобда 8 та медаль, 10 та диплом, қимматбаҳо совғалар ва энг муҳими, тезкор техник ва тактик йўналиш бўйича мусобақа кубогини ютишга муваффақ бўлди. Бу ютуқ жамоанинг тайёргарлиги, интизоми ва юксак ватанпарварлик туйғуси самараси бўлди.

25 давлатнинг тажрибали снайперлари иштирок этган мусобақада юртимиз шарафини муносиб ҳимоя қилган мерганларимиз Ислом Каримов номидаги Тошкент халқаро аэропортида тантанали кутиб олинди.

Ғолиблар кўкрак нишонлари ва эсдалик совғалари билан тақдирланди.

<iframe width="650" height="420" src="https://www.youtube.com/embed/EERtA7Swfio" title="O‘zbekiston Milliy gvardiyasi jamoasi xalqaro snayperlar musobaqasida g‘alaba qozondi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова, Анвар Аҳмедов (видео), ЎзА