АҚШда Дюк университети қошидаги клиника шифокорлари бир чақалоқнинг тўхтаб қолган юрагини бошқасининг кўкрак қафасида қайта ишга туширди. Бу ҳақда BBC хабар берди. Шифокорларнинг таъкидлашича, донор юрак трансплантация қилинишидан олдин уришдан тўхтаб қолган. Одатда потенциал донор юрак кўчиришдан олдин тўхтаб қолса, уни трансплантация қилиш мумкин бўлмайди. Шунга қарамай, бу ёндашув биринчи марта 3 ойлик чақалоқда ўтказилган операцияда муваффақиятли қўлланди.

Бугун, 24 июль куни Таиланд ва Камбоджа ҳарбийлари ўртасида қуролли тўнашувлар бошланди. The Guardian нашрининг хабар беришича, Таиланд қўшнисига ҳаво ҳужумлари билан жавоб қайтарган. Таиланд расмийларининг таъкидлашича, Камбоджанинг 6 нафар қуролланган аскари мамлакат чегарасига яқинлашган. Орадан кўп ўтмай, ҳавода дронлар ҳам пайдо бўлган. Таиландликлар вазиятни юмшатиш учун уларга огоҳлантириш бергани, бироқ Камбоджа томони бунга ўт очиш билан жавоб қайтарганини даъво қилди.

Бортида 43 киши билан парвоз қилаётган Ан-24 самолёти Амур вилоятида радарлардан ғойиб бўлгач, уни қидириш учун М-8 вертолёти юборилди. Орадан кўп ўтмай ҳаво кемаси Амур вилоятининг Тинда шаҳридан 15 км узоқликдаги тоғ ёнбағридан топилган. Россия нашрларининг фавқулодда хизматларга таяниб хабар беришича, фожиадан омон қолганлар йўқ. Унинг бортида 43 киши, жумладан беш нафар бола ва экипажнинг олти аъзоси бўлган. Кейинроқ буни Амур вилояти губернатори Василий Орлов ҳам тасдиқлади.

Ҳиндистон полицияси сохта элчихона юритишда айбланаётган эркакни ҳибсга олди. Бу ҳақда The Guardian хабар берди. Таъкидланишича, айбланувчи Деҳли яқинидаги ижарага олинган турар жой биносидан элчихона сифатида фойдаланган. Гумонланувчи ўзини элчи сифатида таништирган ва одамларга хорижда иш топиб беришни ваъда қилиб, улардан пул ундирган. Полиция маълумотларига кўра, айбланувчи — 47 ёшли Ҳаршвардхан Жаин — Seborga ва Westarctica каби тузилмаларда маслаҳатчи ёки элчи сифатида ишлаганини даъво қилган.

АҚШ президенти Дональд Трамп маъмурияти мамлакатга ота-онаси ёки васийисиз келган муҳожир болаларни зудлик билан депортация қилишга киришди. Бу ҳақда CNN хабар берди. Мамлакат ички хавфсизлик вакилларининг билдиришича, федерал агентлар ўсмирлардан мамлакатни ихтиёрий равишда тарк этишни хоҳлаш-хоҳламасликларини сўрамоқда. Янги сиёсат 14 ёшдан 17 ёшгача бўлган болаларга амал қилиши билдирилган.

Эрон президенти Маъсуд Пезешкиён мамлакат Исроил билан урушга тайёрлигини ва ядро дастури давом эттирилишини маълум қилди. Бу ҳақда Al Jazeera хабар берди. Президент мамлакатлар ўт очишни тўхтатиш борасида оптимистик муносабатда эмаслигини айтган. Пезешкиён бу ҳақда 23 июль куни эфирга узатилган Al Jazeera телеканалига берган эксклюзив интервьюсида маълум қилган. Раҳбарнинг оммага интервью бериши Исроил билан 12 кунлик уруш тугаганидан бери биринчиси бўлди.

<iframe width="650" height="420" src="https://www.youtube.com/embed/JC16Q7Jk0jk" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА