Ўзбекистон ва Мўғулистон Президентлари ҳамкорликни кенгайтириш муҳимлигини қайд этдилар
Ўзбекистон Республикаси Президенти Шавкат Мирзиёев ва Мўғулистон Президенти Ухнаагийн Хурэлсухнинг телефон орқали мулоқоти бўлиб ўтди.
Мўғулистон Президенти давлатимиз раҳбарини таваллуд куни билан самимий табриклаб, унга мустаҳкам соғлик, бахт-саодат, фаровонлик ва катта муваффақиятлар, Ўзбекистон халқига эса равнақ тилади.
Суҳбатда жорий йил июнь ойида Мўғулистонга амалга оширилган ташриф доирасида ўтган олий даражадаги икки томонлама учрашувлар якунида эришилган келишувларни амалга оширишга алоҳида эътибор қаратилди.
Қабул қилинган "йўл харитаси"ни амалга ошириш, чорвачилик, савдо, транспорт, саноат кооперацияси, кончилик соҳаларида қўшма лойиҳаларни илгари суриш, маданий-гуманитар алмашинув дастури доирасида режалаштирилган тадбирларни ўтказиш муҳимлиги қайд этилди.