Ўтган йилдан бошлаб тестгача фақат фанлар мажмуаси танланади. Қолган муҳим танловлар эса тестдан кейин амалга оширилади.
1. Йўналиш танлаш
Абитуриент 5 тагача йўналишни танлаши мумкин. Бу йўналишлар абитуриент топширган фанлар мажмуасига мос бўлиши керак. ОТМ танлашда ҳеч қандай чеклов йўқ, яъни фанлар мос бўлса, исталган олийгоҳдаги исталган йўналишни танлаш мумкин.
Рўйхатдан ўтишда танланган йўналиш мувоққат эди. Яъни, вақтинча, мисол тариқасида кўрсатилган. Асосий ва ҳақиқий танлов тестдан кейин амалга оширилади. Шунинг учун аввал танлаган йўналишни бемалол ўзгартириш мумкин.
2. Таълим шаклини танлаш
Абитуриент қуйидаги таълим шаклларидан бирини танлайди: кундузги, кечки ёки масофавий. Уларни ҳар хил йўналишларга аралаштириб танлаш ҳам мумкин. Масалан, биринчи ва иккинчи йўналиш учун кундузги, учинчи учун кечки, тўртинчи ва бешинчи учун масофавий шакл танланса бўлади.
Қайси олийгоҳда қайси шакл мавжудлигини квоталар тасдиқлангандан кейин билиб оласиз.
3. Танлов устуворлигини белгилаш
Абитуриент танловда нимага кўпроқ аҳамият беришини белгилайди: давлат грантими ёки йўналишми.
Агар "қайси йўналиш бўлишидан қатъи назар, фақат грантга киришим керак" деса, устуворлик грантга берилади.
Агар "айнан шу йўналишда ўқишим керак, ҳатто контракт бўлса ҳам майли" деса, устуворлик йўналишга берилади.
Муҳим саналар
14–23 июль кунлари тест синовлари ўтказилади. Ҳар бир абитуриент тестдан эртаси куни натижасини билиб олади. Барча тестлар тугагач, йўналиш, таълим шакли ва устуворликни танлаш учун 15 кун вақт берилади. Шундан сўнг умумий мандат шакллантирилади. Мандат натижалари тахминан 17 август атрофида эълон қилинади.
Агар абитуриент ОТМга кира олмаса, ундан кейин коллежларга ва техникумларга ҳужжат топшириш учун яна 10 кунлик имконият берилади.
<iframe width="560" height="315" src="https://www.youtube.com/embed/f8dPZnpBHoY?si=_7QcdwwPWzyrVtVq" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Фардона Яхшибоева, Аброр Содиқов, Улуғбек Тўхтаев, ЎзА