Ҳар бир спорт турининг ўз ихлосмандлари, қизиқувчилари бўлганидек юртимизда бильярд ўйинининг ҳам кўплаб ишқибозлари бор. Сабаби бу ўйин жисмоний ҳаракат билан ақл машқини бирлаштириб, аниқлик ва тез хулоса қабул қилишни талаб этади. У инсонни мушоҳада юритишга, ҳаракатлар нуқтасини тўғри белгилашга, идрокини жамлашга ўргатади.
Олимпия шон-шуҳрати музейида Ўзбекистон бильярд спорти федерациясининг 5 йиллик фаолияти сарҳисобига бағишланган юбилей конгресси бўлиб ўтди. Унда федерация Президентининг 2019 йилдан буён бильярд спорт турларини ривожлантириш бўйича қилинган ишларига оид ҳисоботи тингланди.
Йиғилишда ташкилий масала ҳам кўриб чиқилди. Конгресс аъзоларининг овоз бериши орқали федерациянинг UBSF Президенти лавозимига Ўткир Талипович Камилов яна 5 йил муддатга сайланди.
Кoнгресс дoирасида Федерациянинг янги тузилмаси тасдиқланди ва қатoр лавoзим тайинлoвлари амалга oширилди. Шунингдек, UBSFнинг фаoл аъзoлари мукoфoтлар билан тақдирланди.
Албатта бундай эътибор изсиз кетмайди. Кейинги йилларда республикамизнинг барча ҳудудларида ушбу спорт тури аста-секин оммалашиб бормоқда. Шунга яраша натижалар ҳам кўзга кўриниб қолди. Ўтган йиллар давомида юртимиз бильярдчилари бир қатор халқаро мусобақаларда иштирок этди ва совринли ўринларни қўлга киритди.
Сир эмаски, бильярд ўйнаш кўплаб ёшларимизнинг севимли ҳоббиларидан бири ҳисобланади. Федерациянинг саъйи-ҳаракатлари билан эндиликда ёшларимиз бу қизиқишларини спортчи мақомида давом эттиради ва ўз навбатида юртимиз шарафини халқаро мусобақаларда муносиб ҳимоя қиладилар.
<iframe width="560" height="315" src="https://www.youtube.com/embed/2TkjzyG8aOo?si=LAVHon2tPhwL0WnT" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов
Ёқубжон Мелибоев
Искандар Исматов, ЎзА