Эрон президенти Масъуд Пезешкиён кортежидаги автомобилларга суюлтирилган бензин қуйилгани сабабли таксига ўтиришга мажбур бўлди. Президентнинг махсус инспектори Мустафо Молавийнинг айтишича, воқеа Пезешкиённинг Табризга норасмий ташрифи пайтида юз берган. Казвин вилоятидаги ёнилғи қуйиш шохобчасида президент кортежидаги учта автомобилга сув аралаштирилган бензин қуйилган. Натижада улар белгиланган манзилга етиб бора олмаган. Оқибатда президент хусусий таксида Табризга йўл олишга мажбур бўлган.
Польша Будапештдаги элчисини чақириб олиб, Венгрия билан дипломатик муносабатларни қисқартирмоқда. Польша нашрларининг хабар беришича, мамлакат Ташқи ишлар вазирлиги қарори билан Будапештдаги элчи Себастьян Кенчек 15 июлдан ўз вазифаларини бажаришни тўхтатган.
Украина президенти Владимир Зеленский 17 июль куни мамлакатда 6 ой ичида қурол ишлаб чиқариш миқдори оширилишини маълум қилди. Украина раҳбари кейинги 6 ой ичида мудофаа секторида сезиларли ўзгаришлар бўлишини маълум қилган.
Буюк Британиялик олимлар Антарктидадаги 1,5 миллион йиллик муз бўлакларини бурғилаб олиб, тадқиқот учун Кембрижга олиб келди. Бу ҳақда BBC хабар берди. Олимлар ушбу муз бўлагини эритиш тарихда Ер иқлими қандай бўлгани борасида маълумот беришига ишонч билдирмоқда. Бўлаклар цилиндр ва тўртбурчак шаклларда Антарктида муз қатламининг чуқур қисмидан бурғилаб олган.
АҚШ президенти Дональд Трампга сурункали веноз етишмовчилиги ташхиси қўйилди. Бу ҳақда Оқ уй матбуотига таяниб BBC хабар берди.
Оқ уй матбуот котиби Каролин Левитт 17 июль куни президентнинг соғлиғи ҳақида баёнот берган. Унга кўра, Трампнинг қўлида сўнгги кунларда кўкариш ва шишлар пайдо бўлган. Шу сабаб президент бир қанча тиббий таҳлиллар топширган.
Президентнинг аспирин дорисини қабул қилиб, одамлар билан тез-тез қўл сиқиб кўришиши ушбу кўкаришларга олиб келгани маълум қилинди. Бу эса юрак-қон томир тизимида муаммолар борлигидан далолат беради. Трампга расман сурункали веноз етишмовчилиги тахшхиси қўйилган. Бу ҳолатда оёқ ва қўл томирларининг қонни юракка ҳайдашида муммаолар юзага келади. Оқибатда қон оёқ-қўлларда тўпланиб, шишиб кетади.
Сибир ўзбекларнинг тарихий ватани эканини айтган Ханти Манси автоном округи думаси депутати Тагизаде Холид Боюкага ўғли мандатидан воз кечди. Бу ҳақда унинг ёрдамчиси Андрей Сисоев “ТАСС”га хабар берди. Маълумотга кўра, бу масала юзасидан Югра думасининг навбатдан ташқари йиғилиши белгиланган. Тагизаде ижтимоий тармоқлар орқали расмий баёнот бериши ҳам кутилмоқда. У 7 июль куни ваколатидан воз кечиш ҳақидаги аризани топширган, якуний қарор эса 19 июль куни эълон қилиниши мумкин.
<iframe width="650" height="420" src="https://www.youtube.com/embed/koPJaOrEsO0" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА