Шу кунларда Германиянинг Рейн-Рур ҳудудидаги Дуйсбург, Бохум, Эссен, Хаген ва Мюльхайм шаҳарларида XXXII Бутунжаҳон ёзги Универсиада ўйинларининг қизғин баҳслари давом этмоқда.

Бугун, 18 июль куни 15 та спорт турида беллашувлар бўлиб ўтса, уларнинг 3 тасида талаба-спортчилар медаллар учун кураш олиб боради.  

Ортда қолган мусобақалар сарҳисобига кўра, бугунгача 3 та спорт турида XXXII Бутунжаҳон ёзги Универсиада ўйинларининг дастлабки совриндорлари аниқланди. 

Медаллар жамғариш борасида АҚШлик талаба-спортчилар 3 та олтин, 5 та бронза медали билан етакчилик қилаётган бўлса, кейинги ўринларни 2 та олтин, 2 та кумуш, 1 та бронза медалига эга Корея Республикаси, 1 та олтин, 2 тадан кумуш ва бронзага эга Хитой спорт делегацияси банд этган. Шунингдек, Германия, Дания, Ҳонгконг талаба-спорт жамоалари ҳисобида 1 тадан олтин медаль мавжуд. Умумий ҳисобда 15 та давлат спорт жамоалари совриндорлар қаторидан жой олган.  

Кечаги кун баҳсларида Ўзбекистон спорт делегацияси аъзоси Элдорбек Усмонов 50 метр масофага баттерфляй усулда сузиш бўйича ярим финал мусобақаларида 23.31 сония натижа қайд этиб, финал йўлланмасини қўлга киритиш асносида Ўзбекистоннинг янги рекордини ўрнатгани ўзига хос воқеа бўлди.  

Айтиш лозимки, мазкур йўналишда Ўзбекистоннинг олдинги рекорди 23.32 сониядан иборат бўлиб, ушбу кўрсаткичга Усмонов Тошкентда ўтган биринчи Марказий Осиё чемпионатида эришганди.  

Рейн-Рур ҳудудида дунёнинг 8 минг 500 нафардан зиёд спортчи-талабалари иштирокида давом этаётган ёзги Универсиада ўйинларининг яна бир ўзига хос жиҳати, Эссен шаҳрида иштирокчи давлатларнинг байроқлари майдони очилиш маросими ташкил этилди.  

Унда Универсиадада қатнашаётган 150 тага яқин давлатларнинг байроқлари қаторида жонажон Ватанимиз Ўзбекистоннинг ҳур байроғи сарбаланд бўлди.  

Эслатиб ўтамиз, 27 июлга қадар давом этадиган бу галги ўйинларда Ўзбекистон спортчи-талабалари 11 та спорт тури: камондан отиш, спорт гимнастикаси, енгил атлетика, сувга сакраш, дзюдо, бадиий гимнастика, эшкак эшиш, сузиш, стол тенниси, таэквондо WТ ва теннис спорт турларида иштирок этмоқда.  

Тўлқин Рўзиев, ЎзА