Испанияда 16 майдан 13 июлга қадар ғайри табиий иссиқ туфайли мингдан ортиқ одам ҳалок бўлди. Бу 2024 йилнинг шу даврига нисбатан деярли 1000 фоиз кўп. Мазкур маълумот мамлакат Соғлиқни сақлаш вазирлиги матбуот хизмати ҳисоботида келтирилган.
Аввалроқ Давлат метеорология хизмати (AEMET) жорий йил июнь Испания метеорология кузатуви тарихидаги энг иссиқ ой бўлганини маълум қилганди. Ой давомида АЕМЕТ кўп бор энг юқори ҳарорат кўрсаткичларини қайд этди. 28 июнь куни Эл-Гранадо шаҳрида қайд этилган 46 даражали ҳарорат айниқса диққатга сазовор.
– Статистика 2025 йил 16 майдан 13 июлга қадар жами 1180 киши жазирама тўлқини қурбони бўлганини кўрсатмоқда, – дейилган ҳисоботда. – Бу ўтган йилнинг мос даври билан таққослаганда 1035 фоиз кўп. Яъни, 2024 йил худди шу даврда иссиқ ҳаво туфайли 114 ўлим ҳолати қайд этилган.
Расмий маълумотга кўра, жазирама туфайли ҳаётдан кўз юмганларнинг 95 фоизи 65 ёшдан ошган, аксарияти аёллар эди. Офтоб уришидан ўн кишининг ўлими тасдиқланган. Улардан беш нафари кекса, тўрт нафари 52-62 ёш орасида бўлган.
С.Раҳимов,ЎзА