Tarixda ilk bor O‘zbekiston xalqaro Wiki Lovyes Folklore fototanlovi doirasida mahalliy axborot kampaniyasi tashkilotchisi sifatida ishtirok etdi. Ushbu tashabbus o‘zbek tilida so‘zlashuvchi vikimediyachilar guruhi tomonidan amalga oshirildi va mamlakatning nomoddiy madaniy merosini raqamli shaklda saqlab qolish hamda targ‘ib qilish yo‘lida muhim qadam bo‘ldi.

Tanlov davomida O‘zbekistondan ishtirokchilar Wikimedia Commons erkin omboriga 936 ta surat yukladilar. Barcha suratlar xalq og‘zaki ijodi va madaniyatiga bag‘ishlangan bo‘lib, quyidagi mavzularni qamrab oldi:

– milliy kiyimlar,

– an’anaviy bayramlar,

– xalq hunarmandchiligi,

– musiqiy va raqs marosimlari.

Yuklangan suratlar orasida milliy libosdagi ayollar portretlari, an’anaviy to‘y sahnalari, ustaxonalar va festival kadrlari bor.

Mahalliy kampaniya baholash bosqichini o‘z ichiga olmagan bo‘lsa-da, O‘zbekiston ishtirokchilarining ishlari xalqaro miqyosda e’tirof etildi:

Buxoroda olingan surat tanlovning jahon bo‘yicha eng yaxshi 10 fotosurati qatoriga kirdi.

Milliy libosdagi ayol surati esa “E’tiborga loyiq suratlar” ( Honorable Mentions) toifasiga kiritildi.

Bu natijalar — madaniy kontentni hujjatlashtirish va uni global miqyosda tarqatish borasida mahalliy hamjamiyatning yutug‘i sifatida baholandi.

Mahalliy kampaniya mukofotlash yoki milliy hakamlar hay’atini ko‘zda tutmagan, balki ishtirokchilarni rag‘batlantirish, yordam ko‘rsatish va jarayonga jalb qilishga yo‘naltirilgan edi.

Kampaniya mamlakatning barcha hududlarini qamrab oldi va bu O‘zbekiston madaniyatiga oid vizual kontent atrofida ilk keng ko‘lamli harakatga aylandi.

Tashabbus o‘zbek tilida so‘zlashuvchi vikimediyachilar guruhi tomonidan tashkil etilib, global viki-hamjamiyat va har yili o‘tkaziladigan Wiki Loves Folklore xalqaro loyihasi ko‘magida amalga oshirildi. Tanlovning asosiy maqsadi — turli xalqlarning folklor va madaniy an’analarini raqamli tarzda hujjatlashtirishdir.

Tashkilotchilar 2026-yilda bo‘lib o‘tadigan Wiki Loves Folklore tanlovida ham ishtirok etishni rejalashtirmoqda. Kelgusi maqsad — ishtirokchilar doirasini kengaytirish va suratlar geografiyasini yanada boyitishdir.

"Bu shunchaki tanlov emas. Bu — madaniyatimizni saqlab qolish, uni butun dunyo va kelajak avlodlar uchun ochiq qilish imkoniyatidir", — deydi tashkilotchilar.

Suratlar Wikimedia Commons platformasida erkin litsenziyalar ostida mavjud.

O‘zA