Эртага, 16 июль куни Грузиянинг Батуми шаҳрида шахмат бўйича аёллар ўртасида давом этаётган FIDE жаҳон кубоги 1/8 финалида Умида Омонова дунё рейтингида 3-ўринни эгаллаб турган Тингжи Лига қарши дона суради.

Мазкур босқичда шунингдек, жаҳон аёллар шахматида ўз ўрнига эга бўлган Дзагнидзе(Грузия) – М.Музычук(Украина), Хампи(Ҳиндистон) – Костенюк(Швейцария), Сон(Хитой) – Джавахишвили(Грузия), Чжу ЦзинерХитой) – Дивья(Ҳиндистон), Лагно(FIDE) – Харика(Ҳиндистон), Тан Чжунъи(Хитой) – Осмак(Украина) ва Камалиденова(Қозоғистон) – Вайшали(Ҳиндистон) тўқнаш келади. 

Ортда қолган 3 та тур натижаларига кўра, FIDE жаҳон кубоги ташкилий қўмитаси У.Омоновани 3-тур якунларининг энг яхши шахматчиси сифатида эътироф этди. 

Айтиш лозим, FIDE рейтингида 90-ўринни эгаллаб турган 19 ёшли Умида Омонова ғолиблик йўлидаги ўйинларда франциялик Софи Милье, польшалик Алина Кашлинская ва қозоғистонлик Элназ Калиахметдан устун келди. 

Мукофот жамғармаси 676 минг 250 АҚШ долларидан иборат турнирда ғолибликка эришган шахматчи 50 минг, 2-ўрин соҳиби 35 минг, 3-ўрин эгаси 25 минг АҚШ доллари билан тақдирланади. Мусобақада энг яхши натижага эришган қатнашчиларга ҳам белгиланган тартибда мукофот маблағлари топширилади. 

Эслатиб ўтамиз, FIDE жаҳон кубоги 28 июлга қадар давом этади. 

Тўлқин Рўзиев, ЎзА