Белбоғли кураш

Жорий йилнинг 10-13 июль кунлари Қашқадарё вилоятининг Чироқчи туманидаги спорт мактабида белбоғли кураш бўйича 2012-2013 йилларда туғилган ўғил болалар ва қизлар ўртасида Ўзбекистон чемпионати беллашувлари бўлиб ўтди.

Спорт вазирлиги ҳамда Ўзбекистон белбоғли кураш федерациясининг йиллик тақвимидаги мазкур чемпионатда Қорақалпоғистон Республикаси, Тошкент шаҳри ва барча вилоятлардан 500 нафарга яқин ёш полвонлар белбоғли курашнинг белбоғли кураш ва эркин йўналишида ғолиблик учун кураш тушди. 

Чемпионатнинг биринчи кунида дастлаб мусобақанинг тантанали очилиш маросими ташкил этилди.  

Унда сўз олган Чироқчи туман ҳокими Файзулла Юсупов, Ўзбекистон белбоғли кураш федерацияси раиси Равшан Дастиров ҳамда федерация бош котиби Абдухалил Маликовлар мамлакатимизда жисмоний тарбия ва спортга, хусусан, миллий спорт турларига қаратилаётган юксак эътибор хусусида таъкидлаб, мусобақа иштирокчиларига омад тилади.

Шундан сўнг мусобақа регламентига мувофиқ, беллашувларга старт берилди. Уч кун давом этган чемпионатда ўғил болалар белбоғли курашнинг классик ва эркин йўналишида 13 та вазн тоифасида, қизлар эса эркин йўналишда 9 та вазн тоифасида ўзаро куч синашди.

Таъкидлаш жоиз, мусобақа муросасиз ва кескин курашларга бой тарзда ўтди. Айниқса, оғир вазндаги курашчиларнинг чиқишлари мухлислар олқишига сазовор бўлди.  

Нигора Раҳмонова, ЎзА