Қирғизистон пойтахти Бишкек шаҳрида спорт курашлари бўйича ёшлар (U 20) ўртасида якунига етган Осиё чемпионатида Ўзбекистон терма жамоаси аъзолари 3 та медалга эга чиқди.

Қитъа биринчилигининг илк кунида шоҳсупага кўтарила олмаган эркин курашчиларимиз иккинчи кун дастуридан ўрин олган беллашувларда 1 тадан олтин, кумуш ва бронза медалларини қўлга киритди.

Терма жамоамиз аъзоларидан Шерзод Поёнов -92 килограммда эронлик Туҳид Амирали Нурийни финалда 6:1 ҳисобида мағлубиятга учратиб, иккинчи бор Осиё чемпиони номига сазовор бўлган бўлса, Умархон Муйдинов (-74 кг) кумуш, Абдуллоҳ Ҳабибуллаев (-61 кг) бронза медалларига мушарраф бўлди.

Айтиш лозим, Поёнов ўтган йили Таиландда кечган Осиё чемпионатида ҳам ғолиблик шоҳсупасидан жой олган эди.

Осиё чемпионатида Ўзбекистон эркин курашчилари 6-ўринни банд этди.

Тўлқин Рўзиев,

ЎзА