Украина ҳукумати мамлакатни тиклаш учун умумий қиймати бир триллион долларга тенг икки жамғарма тузишни таклиф қилмоқда. Бош вазир Денис Шмигаль уч йилдан буён давом этаётган уруш туфайли мамлакатни қайта тиклаш учун лозим бўладиган харажатни 850 миллиард еврога баҳолаб, бу жараён босқичма-босқич 14 йил давом этишини айтди.

Римда Украина масаласига бағишлаб ўтказилган, Президент Владимир Зеленский шахсан қатнашган махсус конференцияга ҳукумат раҳбари видео ҳавола орқали қўшилган.

– Режамизга кўра, биринчи фонд – Киев томонидан бошқариладиган “Украина жамғармаси” Россиянинг хориждаги мусодара қилинган 460 миллиард евродан ортиқ активи ҳисобидан шакллантирилади, – деди Шмигаль. – Қарийб 400 миллиард евролик иккинчи жамғарма эса хусусий сармоя ёрдамида тўпланади.

Шунингдек, у иттифоқчиларни 2026-2027 йиллар бюджети тақчиллигини бартараф этиш учун қўшимча молиявий ресурс ажратишга чақирди:

– Ҳарбий харажат ҳозир 100-120 миллиард долларни ташкил этмоқда. Тинчлик даврида Украина қўшинини сақлаш йилига 50 миллиард еврога тушади. ЕИ шу маблағнинг ярмини беришидан умидвормиз.

<iframe width="650" height="420" src="https://www.youtube.com/embed/WD4OtpbGiWY" title="Ukrainani qayta tiklash uchun qancha mablag‘ kerak?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА