Биткоин нархи 9 июль куни 112 минг доллардан ошиб, янги рекорд ўрнатди. Бу инвесторларнинг хатарли активларга бўлган глобал талабининг ўсиши сабаб юзага келди. Рекорд қайд этилишига биткоин дефицитининг 200 миллион долларлик ликвидацияси асосий туртки бўлган. Биткоиннинг нархи 9 июль куни сўнгги ҳафта давомида 5,95 фоизга кўтарилиб, биринчи марта тарихдаги энг юқори кўрсаткич — 112 минг доллардан ошган. Бинанcе ва Cоинбасе платформаларида қайд этилган ушбу кўрсаткич криптовалюта бозоридаги энг юқори нарх сифатида қаралмоқда.

Канададаги ўрмон ёнғинларидан чиқаётган тутун жанубга силжиб, АҚШ фуқароларига “ёз фаслидан завқланишни қийинлаштирмоқда”. Бу борада Қўшма Штатлар Конгрессининг 6 нафар аъзоси Канада элчихонасига мактуб йўллади. “Биз сизга ёздан завқ олишни қийинлаштираётган Канададаги ўрмон ёнғинлари ҳақида ёзяпмиз”, дейилган элчи Кирстен Ҳиллманга юборилган хатда.

Арманистон ва Озарбайжон раҳбарлари Бирлашган Араб Амирликларида 10 июль куни қарийб 40 йиллик кескинликдан сўнг тинчлик музокараларини ўтказмоқда. Арманистон бош вазири Никол Пашинян ва Озарбайжон президенти Илҳом Алиев Абу-Дабига ташриф буюрган. Икки мамлакат март ойида тинчлик лойиҳасига келишиб олган эди. Жанубий Кавказ давлатлари 1980 йилларнинг охиридан бери бир қатор урушлар олиб борган. Ўша йилларда Озарбайжоннинг Тоғли Қорабоғ вилояти Арманистон ёрдами билан мамлакатдан ажралиб чиққан эди.

Жанубий Кореянинг собиқ президенти Юн Сок Ёл 9 июль куни қайта ҳибсга олинди. Бу ҳақда BBC хабар берди. Собиқ президент 2024 йили мамлакатда сиёсий нотинчлик келтириб чиқарганликда айбланмоқда. У апрель ойида 6 соатлик ҳарбий тартиб буйруғи учун импичментга учраганди. Сеул марказий округи судяси 9 июль куни Юн “далилларни йўқ қилиши мумкинлигидан қўрқиб”, уни ҳибсга олишга ордер берган. Жанубий Кореянинг ҳибсга олинган биринчи президенти бўлган Юн ҳарбий ҳолат жорий этишга уриниши туфайли қўзғолонга раҳбарлик қилганликда айбланиб суд қилинмоқда.

АҚШ президенти Дональд Трамп Бразилияда ишлаб чиқарилган товарлар импортига 50 фоизлик солиқ солишини маълум қилди. Трамп бу қарорини ижтимоий тармоқда эълон қилган ва Бразилияга расмий хат юборган. Унда Трамп Бразилияни АҚШ технология компанияларига “ҳужумлар” уюштирганликда айблаган. Шунингдек, у собиқ Бразилия президенти Жаир Болсонаруга қарши судни бекор қилишни талаб қилмоқда. 2019—2022 йилларда Бразилияни бошқарган Болсонару 2023 йил январь ойида давлат тўнтаришига уринишда айбланиб, судланмоқда.

Латвия ҳукумати давлат хизматчиларининг Россия ва Беларусга боришини чекловчи қонунни қабул қилди. Бу ҳақда “NRA” нашри хабар бермоқда. “Латвия давлати ва унинг фуқаролари учун хавф-хатар туғилиши эҳтимолини оширадиган геосиёсий вазиятни ҳисобга олган ҳолда, қонун чиқарувчи орган айрим шахслар гуруҳларининг Россия Федерацияси ва Беларусь Республикасига боришини чеклаш тўғрисида қарор қабул қилди”, дейилади ҳужжатга берилган изоҳда.

<iframe width="650" height="420" src="https://www.youtube.com/embed/gO2mAGJ77QE" title="XALQARO DAYJEST" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА