Францияда қизлар жамоалари ўртасида ўтаётган “Paris World Games” ўйинларининг гуруҳ босқичида ҳамюртларимиз етакчиликни қўлга киритди.

Кеча Ўзбекистон U-18 терма жамоаси гуруҳдаги асосий рақибларидан бири саналган  “Dole-Choussin” (Франция) билан рўбарў келди.  

Гуруҳда ҳар икки жамоада ҳам 2 очко мавжудлиги учрашувнинг ҳар жиҳатдан муросасиз кечишини таъминлади.  

Шиддатли ўтган ўйинда ҳамюртларимиз ғалабага бўлган кучли иродасини намойиш этди ва франциялик рақибаларини 22:8 ҳисобида мағлуб этиб, гуруҳда якка пешқадамга айланди.  

Гандболчи қизларимиз гуруҳдаги сўнгги учрашувни Франциянинг яна бир жамоаси “Volenсeiennes Handball”га қарши ўтказди. 2008-2009 йилларда туғилган гандболчилардан ташкил топган терма жамоамиз французларни 24:17 кўринишида доғда қолдирди.  

Ўз гуруҳида Бразилия терма жамоасини 32:14, “Dole-Choussin”ни 22:8, “Volenсeiennes Handball”ни 24:17 ҳисобида енгган Ўзбекистон қизлар терма жамоаси “Paris World Games”даги муваффақиятли одимни давом эттирмоқда.  

Т.Рўзиев, ЎзА