Италиянинг Милан шаҳридаги Бергамо аэропортида самолёт двигателига кириб кетган эркак вафот этди. Учоқ 8 июль куни Испаниянинг Астурия шаҳрига учишга тайёргарлик кўраётган бўлган. Самолёт учиш-қўниш йўлагига чиққан пайтда номаълум шахс югуриб келиб, ҳаракатдаги двигателга яқинлашган ва унинг ичига тортилиб кетган. Фожиа самолёт ҳали ҳавога кўтарилмасидан аввал рўй берган.

Жанубий Корея 2025 йил бошида денгиздан қутқариб олинган 6 нафар шимолий кореялик қочқинни ўз ватанига қайтариб юборди. Қочқинлар март ва май ойларида кемада икки давлат денгиз чегараси орқали сузиб ўтганди. Сеулнинг маълум қилишича, улар уйга қайтиш истагини бир неча бор билдириб, ўзларининг “тўлиқ ризолиги билан” ватанига қайтарилмоқда.

Жорий йил 8 июль куни Франция президенти Эммануэль Макрон рафиқаси билан Буюк Британияга уч кунлик давлат ташрифи билан келди. Уларни Уэлс шаҳзодаси Уильям ва Кейт Миддлтон қарши олди. Расмий учрашувлар, дипломатик тадбирлар ва қироллик маросимларини ўз ичига олган ушбу ташриф ҳали бошланганига кўп бўлмасдан, Брижит Макроннинг Нортхолт ҳарбий базасида кутиб олинган пайтдаги хатти-ҳаракати ижтимоий тармоқларда муҳокама марказига айланди. Самолётдан биринчи бўлиб чиққан президент Макрон рафиқасига қўл узатди — бу жентелменлик ишораси сифатида баҳоланди. Бироқ Брижит Макрон турмуш ўртоғининг қўлини кўрмасликка олиб, трапдан мустақил равишда тушди. Бу лаҳза камераларга қайд этилди ва дарҳол интернетда тарқалди.

Исроил ва ХАМАС расмийлари Ғазода ўт очишни тўхтатиш бўйича келишувга эришишга яқин турибди. Бу ҳақда Қатардаги музокаралардан хабардор манбаларга таяниб, Sky News хабар берди. Музокараларда ҳал қилинмаган ягона масала — Ғазодаги Исроил армиясининг мақоми ва ҳудудда қолиш муддати. Исроил олдида танлов турибди: урушни тугатиб, барча гаровдагиларни олиб Ғазодан чиқиб кетиш ёки минтақани номаълум муддатга ҳарбий назорат остида сақлаб қолиш.

Халқаро жиноий суд 8 июль куни “Толибон” етакчиси Ҳайбатуллоҳ Охундзода ва Афғонистон Олий суди раҳбари Абдул Ҳаким Ҳаққонийни аёлларни таъқиб қилишда айблаб, уларни ҳибсга олишга ордер берди. Бу ҳақда CНН хабар берди. Бу икки етакчи “Толибон”нинг гендер сиёсатига “мос келмайдиган” аёл ва қизларга “буйруқ бериш, ундаш ёки даъват қилиш”да айбдор деб топилган.

Россия президенти Владимир Путин ва бошқа расмийлар Украина билан учинчи раунд музокараларни, ҳатто етакчилар даражасида ҳам ўтказишга қарши эмас. Бу ҳақда Туркия ташқи ишлар вазири Хоқон Фидан TRT Haber телеканалига берган интервьюсида маълум қилди.

Унинг сўзларига кўра, Россия ва Украина учун тинчликка энг яқин бўлган пайт Истанбулдаги музокаралар эди. Россия ҳозирда музокараларнинг учинчи раундига тайёр ва қарши томоннинг жавобини кутмоқда.

<iframe width="650" height="420" src="https://www.youtube.com/embed/4Or1MpzVENk" title="XALQARO DAYJEST" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА